Odaya Tabîban a Amedî îlan kerdbi ke ê Xelata 'Haştîye, Dostanîye û Demokrasî' do bidê Emîne Şenyaşar.

Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyabî, serrêke ra zêdêr o verê Edlîyeya Riha de nobeta edaletî kena.

Odaya Tabîban vizêr otêlêla Yenîşehîrî ya Amedî de merasîmêk viraşt û xelate daye Emîne Şenyaşar. Sereka Konseya Merkezî ya Yewîya Tabîban a Tirkîya (TTB) Şebneme Korur Fîncanci bi rayîrê ZOMMî, Endamê Konseya Merkezî ya TTByî Halîs Yerlîkaya, avûkatê Keyeyê Şenyaşarî, îdarekarê Rêxistina HDPyî ya Amedî, Mayê Haştîye zî tede xeylêk tewrê merasîmî bîyî.

Qiseykerdiş û wendişê mesajan ra dima derheqê xoverdayîşê Keyeyê Şenyaşarî de sînevîzyonêk ame mojnayene. Dima Endamê Heyetê Rûmetî yê TTByî Mahmut Ortakkayayî xelate daye Emîne Şenyaşar.

Emîne Şenyaşar da zanayene ke keyeyê Yildizî keyeyêko tarî yo û ê do têkoşînê xo yê edaletî ra fer vera medê.