Xeylî bajaranê Almanya, Fransa, Hollanda û Avusturya de semedê azadîya Rayberê Şarê Kurdî Abdullah Ocalanî çalakîyî ameyî viraştene.

FRANKFURT

Bajarê Frankfurtî yê Almanya de rayberîya Civaka Azad de xeylî kurdîstanijî bi posteranê Ocalanî vejîyayî kuçeyan. Çalakwanan bi rayîrraşîyayîşêk û mîtîngêk tecrîd protesto kerd

 

BERLÎN

Paytext Berlîn de zî Meclîsê Şarî yê Berlînî û Meclîsê Cinîyan ê DEST DANî çalakîyêk organîze kerde. Qiseykerdişan de ame vatane ke Ocalano ke sey Mandela û Gandîyî rayberêk o ganî gamêk cuwa ver serbest bêro veradayene.

 

HAMBURG

Bi heman waştişî Hamburg de zî çalakîyêk ameye viraştene. Bajaranê Bremen û Kiel ra zî kurdîstanijî tewrê ci bîyî û bi posteranê girdan yê Ocalanî dîqet ant tecrîdî ser. Çalakî de Parlamenterê Partîya Çepî yê Hamburgî Martîn Dolzerî qisey kerd. Dolzerî tecrîdo ke Ocalanî ser o yo sey sûcê merdimîye hesibna û waşt ke wa cade bêro wedartene.

 DARMSTADT

Bajarê Darmstadtî de zî seba azadîya Rayberê Şarî Kurdî Abdullah Ocalanî rayîrraşîyayîşêk ame viraştene. Çalakwanan bi slogananê  “Es lebe Ocalan – Bicuyo Ocalan”, “Freiheit fur Ocalan – Ocalanî rê azadîye” vilawekî vila kerdî.

STUTTGART

Stuttgart de zî bi hezaran kurdîstanijî vejîyayî meydanan û bale ante tecrîdê Îmralî ser. Qiseykerdişan de polîtîkaya tecrîdî û bêvengîya Ewropa ameyî şermezarkerdene û azadîya Ocalanî ameye waştene.

SAARBRUCKEN

Saarbrucken de zî kurdîstanijan û dostanê ci semedê protestokerdişê tecrîdî çalakîyêk viraşte. Çalakwanan hukmatê Almanya ra waşt ke wa vera tecrîdî bivejî.

FREIBURG

Freiburg de zî bi çalakîyêk tecrîdê Îmralî û bêvengîya Ewropa ameyî protestokerdene. Çalakwanan bi sloganan Ocalanî rê heskerdiş û giredayîşê xo ramojnayî û waşt ke wa gamêk cuwa ver tecrîd bêro wedartene.

KASSEL

Kassel de zî kurdîstanijî û dostê ci meydanan de semedê azadîya Ocalanî qîrayî,  polîtîkaya hêrişkare ê Tirkîya şermezar kerde û welatanê Ewropa ra waşt ke wa vera naye bêveng memanî.

MONTPELLIER

Bajarê Montpellierî yê Fransa de zî tecrîdo giran  ke Ocalanî ser o yeno domnayene ame şermezarkerdene. Çalakwanan derheqê felsefeya Ocalanî û tecrîdî de vilawekî vila kerdî.

VÎYANA

Paytextê Avusturya Vîyana de zî semedê şermezarkerdişê tecrîdî çalakîyî bêmabên dewam kenî. Vizêr zî bi çalakîyêk azadîya Ocalanî ameye waştene.

GRAZ

Bajarê Grazî de zî bi çalakîyêk  tecrîd ame protestokerdene û sozê berzkerdişê mucadaleyî ame dayene.

DEN HAAG

Bajarê Den Haagî yê Hollanda de zî bi çalakîyêk tecrîdo ke serê Ocalanî de yeno domnayene ame şermezarkerdene û ame vatene ke heta azadîya Ocalanî çalakîyê kurdan do bêrî domnayene.