Vera tecrîdo ke dewleta tirkî serê Rayberê Şarê Kurdî Abdullah Ocalanî de  dana domnayene  Ewropa de çalakîyî vila benî. Vizêr reyna xeylî welatan de tecrîd û qerarê Amerîka ameyî protestokerdene.

FRANKFURT

Bajarê Frankfurtî yê Almanya de  rayberîya Merkezê Komelê Kurdan ê Mezopotamya de verê konsolosxaneyê Amerîka de çalakîyêk ameye viraştene. Çalakwanan qerarê Amerîka protesto kerd û azadîya Ocalanî waşte.

DEN HAAG

Bajarê Den Haagî yê Hollanda de zî  verê Sersefîrîya Amerîka de çalakîyêk ameye viraştene. Çalakwanan bi slogananê Ocalan û PKKyî qerarê Amerîka rê reaksîyon ramot.

KOPENHAG

Paytextê Danîmarka Kopenhag de zî bi heman waştişî  kurdîstanijî û dostê înan meydanan de bî. Çalakwanan verê konsolosxaneyê Amerîka de bi alayanê PKKyî û posteranê Ocalanî çalakîyêk viraşte.

Çalakwanan bale ante mucadeleyê Têgêrayîşê Azadîye yê Kurdîstanî yê ke vera çeteyanê DAÎŞî dayo ser û qerarê Amerîka şermezar kerd.

BORLANGE

Bajarê Borlange yê Swedî de zî  rayberîya Têgêrayîşê Ciwanên Şorişgêrî  de rayîrraşîyayîşêk ame viraştene. Çalakwanan qerarê Amerîka şermezar kerd û mesajê xoverdayîşî dayî.

MELBOURNE

Heto bîn ra bajarê Melbourne yê Awusturalya de zî bi wesîleya serragêrayîşê îdamkerdişê Seyîd Riza û embazanê ci aktîvîteyêk amî viraştene. Vîrardiş de derheqê terteleyê Dêrsimî de ame qiseykerdene.