Bajaranê Marsîlya û Bordeauxî yê Fransa, bajaranê Stuttgart, Gîessen, Bremen, Mannheîm, Nurnberg û Halle yê Almanya û bajarê Lavrîo yê Yunanîstanî de Roşanê Ganebîyayîşî ame pîrozkerdene

MARSÎLYA

Bajarê Marîlya yê Fransa de Kurdîstanijan û dostanê înan bi coşêkê girdî Roşanê Ganebîyayîşî pîroz kerd.

Şewe de mesajê Hemserekê Konseya Rayberdişî yê KCKyî Cemîl Bayikî yê derheqê ronayîşê PKKyî bi rayîrê sînevîzyonî ameyî seyrkerdene.

BORDEAUX

Bajarê Bordeuxî de zî Roşanê Ganebîyayîşî bi şewêk ame pîrozkerdene. Şewa ke bi seyan kesî tewrê ci bîyî bi rêzgirewtişî dest pêkerd. Bado zî bi kilamanê Koma Stêrk, Songul Pake, Hozan Comert û Hozan Menalî dewam kerde.

STUTTGART

Bajarê Stuttgartî yê Almanya de zî serragêrayîşê ronayîşê PKKyî bi aktîvîteyêk ame pîrozkerdene.

Bi seyan kesî tewrê şewê bîyî, bi kilamanê hunermendan govend girewt û bi slogananê PKKyî  roşanê xo pîroz kerd.

GÎESSEN

Bajarê Gîessenî de zî şewa Roşanê Ganebîyayîşî û Paştîdayîşê Efrînî  ameye organîzekerdene.

Şewa ke nizdê hezar kesî tewrê ci bîyî hemserekê KCDK-Eyî Yuksel Koçî xîtabê şelîgî kerd.

Koçî vist vîrî ke ewro tena vakûrê de nê çar perçeyê Kurdîstanî de bi felsefeya Rayberê Şarê Kurdî Abdullah Ocalanî mucadeleyê kurdan bi girdbîyayîşî dewam keno û vat ke şarê kurdî serkewtişî  rê  nizdî bîyo.

Koçî veng da Almanya zî û waşt ke qedexeyê serê PKKyî ke bîlaheq ameyo girewtene wa cede bêro wedartene.

Qiseykerdişê Koçî bi slogananê “Bijî Serok Apo” û ‘‘ PKK şar o şar tîya de yo‘‘ ame birnayene.

Şewe bi deyîranê hunermendan û govendî qedîyaye.

MANNHEIM

Bajarê Mannheîmî de zî Kurdîstanijan û dostanê înan Roşanê Ganebîyayîşî pîroz kerd.

Şewe de bi nameyê KCDK-Eyî Amed Çekdarî qisey kerd.

Çekdarî vist vîrî ke  mucadeleyê kurdan wextanê zehmetan ra ravêrt la serkewtişêko rêzdar vist dest.

Aktîvîsta TJK-Eyî Zozan Serhate zî va: ‘‘Mucadeleyê ma ke bi Zîlan, Berîtan û Sarayan dest pêkerd ewro çar perçeyê Kurdîstanî de beno zergûn û do muheqeq bireso serkewtişî.‘‘

HALLE

Halle de zî bi tewrbîyayîşê seyan kesan şayîyêk ameye viraştene.

Sîyasetmedarê kurdan Feysal Sariyildiz sey qiseykerdoxî tewrê şewe bi.

Sariyildizî bale ante xoverdayîşê kurdan ser û va: ‘ îşxalkarî wazenê ke qezenecanê kurdan ê 40 serran dest ra bigêrê. La şarê kurdî sey vizêr ewro do zî milê xo verê înan de çewt mekero û mucadeleyî hîna xurt bikero.

BREMEN

Bremen de zî heman waştişî şewêk ameye viraştene.

Şewe de mesajê Hemserekê Konseya Rayberdişî yê KCKyî Cemîl Bayikî bi rayîrê sînevîzyonî ameyî seyrkerdene.

Bado zî hunermendê sey Koma Agîrê Rojava, Koma Zarokên Aram Tîgran, Bulent Turan, Binevş, Suleyman Rengîn, Jiyan Arjîn, Îbo Qamişlo vejîyayî sehneye.

NURNBERG

Bajarê Nurnbergî de zî bi hezaran kesan Roşanê Ganebîyayîşî pîroz kerd.

Şewe de derheqê tarîxê PKKyî de sînevîzyonêk ame ramojnayene. Reyna mesajê Cemîl Bayikî zî ameyî seyrkerdene.

Bado zî sîyasetmedarê kurdan ra Kemal Aktaşî qisey kerd.

Aktaşî serragêrayîşê ronayîşê PKKyî sey serragêrayîşê heme kurdan name kerd  û vat ke ma heme ewro 40 serrî yê.

Aktaşî grevê Leyla Guvene zî silam kerd û waşt ke tecrîdê serê Ocalanî bêro wedartene.

LAVRIO

Bajarê Lavrîo yê Yunanîstanî de zî şarê kurdî û dostanê înan serragêrayîşê PKKyî pîroz kerd.

Şewe de mucadeleyê PKKyî ame silamkerdene û mesajê paştîdayîşî ame dayene.