Wekîla Partîya Çep a Keske ya Wanî Gulcane Kaçmaz Sayyîgît derheqê temsîlîya cinîyan a sîyasîye, xebatanê cinîyan, şîdetê vera cinîyan de ANFyî rê qisey kerd.

Sayyîgîte da zanayene ke wekîlê Partîya Çep a Keske se ra 49 cinî yê û hûmara înan Meclîs de 30 a. Sayyîgîte ard ziwan ke ê do Meclîs de tim meseleyanê cinîyan bîyarê rojdem û vat: ''Biewnê partîyanê bînan de serekêka cinîye zî çin a. La partîya ma reya verêne hişmendîya serdestîya camêrdan bin kerde û prensîbê temsîlîya têdûşte arde Meclîsî. Ma do babetanê sey têdûştîya cînsîye, xizanîya cinîyan, kiştişê cinîyan û Peymana Îstanbulî bîyarê Meclîsî, seba nînan têkoşînêkê qerardarî bikerê. Teyna Meclîs de ney her ca de ma do xo rêxistin bikerê û mîyanê komelî de aktîvîteya cinîyan bizêdînê.''

Sayyîgîte bale ante ser ke şîdetê vera cinîyan zaf zêdîyayo û vat: ''Îqtîdar keno ke bi taybetî cinîyan ê kurdan pê teda, destbendkerdiş û tepiştişî bitersno. La nê xîretê îqtîdar pûç ê. Ma do qetî têkoşînê xo ra fek vera nêdê. Embazê ma bînaya partîye de qetil benê, bi hezaran embazê ma tepişîyenê. Rixmê nînan zî ma verê polîtîkayanê teda yê îqtîdarî gênê.''

Sayyîgîte da zanayene ke xokiştişê cinîyan sîyasî yo û vat: ''Peyê nê xokiştişan de polîtîkayê îqtîdarî est ê. Îqtîdar cinîyan xizan keno, mexdûrê şîdetî keno û nê şîdetî peygoş keno. Îqtîdar şîdetê vera cinîyan teşwîq keno, şîdetî bêceza verdeno û sûcdaran paweno. Ganî ma nê hetê polîtîkî yê xokiştişê cinîyan teşhîr bikerê. Seba ke peynîya xokiştişê cinîyan bêra ganî polîtîkayê winayênî nêrê caardene û têdûştîya komelkîye bêra caardene. Yew cumleya cînsîpereste ya ke sîyasetmedarê camêrdî vanê beno ke biba sebebê xokiştişê cinîyan.''