Kadroyanê serkêşan ê PKKyî ra Mehmet Hayrî Durmuş, Kemal Pîr, Akîf Yilmaz û Alî Çîçek 14ê temmuza 1982yî de Zîndanê Amedî de vera îşkence û kerdişanê xiraban dest pê rojeyê mergî kerdbî û rojeyê mergî de şehîd bibî. Xoverdayoxê 14ê Temmuze yê Zîndanê Amedî xeylêk şaristananê Kurdîstan û Tirkîya de ameyî yadkerdene. 

Çewlîg de Rêxistina HDPyî ya şaristanî panelê 'Xoverdayîş Ciwîyayîş o' kerd. Endamê Komeleya Huqûqnasanê Seba Azadîye (OHD) Yusuf Çakas û endamê Meclîsê Partîye yê DBPyî Îsmaîl Kino û Mustafa Mesut Tetîk panel de qisey kerd.  Îsmaîl Kinoyî çîyê ke Zîndanê Amedî de ameybî kerdene û Kurdîstan de yenê kerdene seyci yê. Mustafa Mesut Tetîkî zî dîyar kerd ke 14ê Temmuze vera Darbeya 12ê Êlule cewabêk bi. Avûkat Yusuf Çakasî zî ard ziwan ke ganî xoverdayîşê 14ê Temmuze zîndanan de sînordar nêmino û her kes bi na mesuldarî têbigêro.

Êlih de Sendîkaya Petrol-Îşî de DBP û Xîretê 78an pîya panelêk viraşt. Wekîlê HDPyî yê Êlihî Necdet Îpekyuz, Hemşaredara Êlihî Songule Korkmaz, aktîvîstê TJA, Meclîsê Mayanê Haştîye, Endama PMyî ya DBPyî Nurtene Uzumcu, Rêxistina HDPyî ya Êlihî û xeylêk kesî tewrê panelî bîyî. Qiseykerdoxanê pannelî Şehmuz Doku û Yaşar Kircayî pare kerd ke ganî têkoşînê vera zulmî ewro zî dewam bikero.

Semsûr de Rêxistina HDPyî ya şaristanî bînaya xo de panelêk kerd. Panel de Hemsereka HDPyî yê qezaya Merkezî Yeşîme Camcî moderatorîye kerde. Dima derheqê xoverdayoxanê 14ê Temmuze de sînevîzyonêk ame mojnayene.

Dîlok de Rêxistina HDPyî ya şaristanî bînaya xo de panelêk serûber kerd. Endamanê Xîretê 78an ê Dîlokî Mûstafa Denktaş, Muslum Erîklî û Mûstafa Kaplan, endamê Meclîsa Partîye yê DBPyî Denîz Yildiz tewrê panelî bîyî. Yildizî panel de qisey kerd û vat: ''Ma do tim têkoşînê înan bidê ciwîyayene û îdealanê înan bîyarê ca.''

Îstanbul de qezayanê Sultanbeylî, Esenler û Bagcilarî de, hetê TUHAD-FED, Xîretê 78an bi şîarê 'Ma bi ruhê 14ê Temmuze ver bi azadîye şinê' panelî ameyî kerdene. Panelê Bagcilarî de Celalettîn Canî qisey kerd û qala wextê îşkenceyanê Zîndanê Amedî û xoverdayîşê 14ê Temmuze kerde. Panelê Sultanbeylî de TUHAD-FEDî ra Vedîha Gunay û Nurettîn Adamişo ke 30 serran zîndan de mendo, qisey kerd. Înan dîyar kerd ke Xoverdayîşê 14ê Temmuze vîrê kurdan o. Panelê Esenlerî de zî nuştox Firat Can û Vervatoxê HDKyî yê Îstanbulî Erkan Tepelîyî qisey kerd. Înan da zanayene ke ewro zîndanan de zulm dewam keno û ganî her kes wayîrê tepişteyan û keyeyanê înan vejîyo.

Adana de bi wesîleya serrgêra xoverdayîşê 14ê Temmuze ciwanan dêsî ser o nuşteyî nuştî. Ciwanan taxa Denîzlî ya qezaya Seyganî de nuşteyê 'Ruhê 14ê Temmuze Avaşîn de ciwîyeno', 'Ma sey hêzê ciwanan selamê Kemalê Lazî yê', 'Xoverdayîşê 14ê Temmuze' û 'Xoverdayîş ciwîyayîş o' nuştî.