Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra ameybî qetilkerdene û lajêkê ci zîndan de yeno tepiştene, lajê xo Ferît Şenyaşarî reyde verê Edlîyeya Riha de 9ê adara 2021î ra nata Nobeta Edaletî tepişena. Xoverdayîşê Şenyaşaran serrêke xo dima verda.

Serrgêra Nobeta Edaletî de xeylêk temsîlkarê dezgehanê sîvîlan û partîyanê sîyasîyan paştî dayî Şenyaşaran. Îdarekarê HDP, KCD, DBP, Mayê Haştîye, çalakwanê Nobeta Edaletî ya Amedî, xeylêk şubeyê ÎHDyî, cinîyê CHPyî,tesîlkarê OHD û temsîlkarê baroyanê Kurdîstanî Şenyaşarî zîyaret kerdî.

Çalakîye de Kursuyê Edaletî ame ronaye. Verî Hemvervatoxa HDPyî Ebru Gunay qisey kerd. Gunaye vat:  ''Dayîke Şenyaşare raştê îşkenceyê sîstematîkî yena. Hukm qetilkaran paweno. La hinî na çalakîya ma pêrun a. Waştîşê Şenyaşaran waştiş ma yo. Heta caardişê edaletî ma zî do paştî bidê.''

Hemsereka Pêroyî ya DBPyî Salîha Aydenî vat: ''Êyê ke tim qala heq û huqûqî kenê tersê îqtîdarî ra herinda sûcdaran de tim dayîke rê dewa akenê. No zî bêedaletîya Tirkîya ramojneno. Ma vindertişê dayîke û Ferîtî selam kenê, ma do tim kişta înan de bê.''

Hemserekê Pêroyî yê KCDyî Berdan Ozturkî vat: ''Qirkerdişêko pîl ame kerdene. Ma qetilkaran hole nas kenê. Ê do hesab bidê. Ma do tim kişta keyeyî de bê.''

Avukatê keyeyî Bulent Duran zî derheqê bêhuqûqîya ke yena kerdene de qisey kerd. Duranî ard ziwan ke paştgêrê hukmatî hetê hukmî ra yenê pawitene û vat coka qetilkarî nînê cezakerdene û Fadil Şenyaşar bîlasebeb  zîndan de yeno tepiştene. Duranî semedê paştdayîşî veng da û vat: ''Qirayîşê dayîke Şenyaşare zaf giran o, no qîrayîşê edaletî yo. wa pêro goş bidê nê qîrayîşî. Ganî baroyî tewrê dewa bidê, têna pê zîyaretî nêbeno.''

Bi nameyê Înîsîyatîfê Dayîkanê Haştîye çalakwana Amedî Nazîme Boltanî vat: ''Ma sey dayîkan haştîye wazenê. Ma do tim semedê edalet têkoşîn bikerê.''

Çalakîye bi eşkerayîya OHDyî dewam kerd. Eşkerayîye de bale ameye antene xoverdayîşê Şenyaşaran ser û ame vatene ke hukmat qetilkaran paweno. Eşkerayîye de ame waştene ke wa dewa de goreyê huqûqî bêro têgêrayene ke edalet bêro ca. Reyna tewrbîyayoxanê bînan de zî qisey kerd û vera neheqîye paştî da xoverdayîşê Şenyaşaran.

Tewr peynî de Ferît Şenyaşarî qisey kerd. Şenyaşarî semedê paştdayîşî spas kerd  û vat: ''Şer de zî nêweşxanyan rê hêriş nîno kerdene. La 14ê hazîrana 2018î de no sûc tîya de ame kerdene. Qetilkarî binê pawitişê wekîlê AKPyî de teber de destanê xo têşanenê û gêrenê. Dosyaya ma Serdosgerîya Komare ya Riha de ya. Gama ke şinê dozgerî de qisey bikerê, seba ke hetê huqûqî ra cewabê înan çîn ê ma ra remenê. Herinda qetilkaran de ma rê hêriş kenê û dewayan akenê.  Semedê lawikanê dayîka mi heta nika ci rê 14 cipêrsayîşî ameyî akerdene. Nuştoxêko hîsgêr meseleya  ma keno roman. Xoverdayîşê dayîka mi beno belgesel ke festîvalanê mîyannetewîyan bêro ramojnayene. Ma rixmê heme zehmetîyan hêvîya xo vînî nêkenê. Ma cuye  û edaletî ra hende hes kenêke semedê înan mirenê. Têkoşînê ma do heta serkewtişî dewam bikero.''

Qiseykerdişê Şenyaşarî bi slogana ''Hêrsê dayîkan û qetilkaran bifatisno'' qedîya.