Seba qedînayîşê tecrîdkerdişê Rayberê Şarê Kurdî Abdullah Ocalanî, hemsereka KCD’yî Leyla Guvene ya ke 7’ê Teşrîna Peyêne ya 2018’î ra nata grevê vêşanîye de ya, 180 rojî yo çalakîya xo domnena.

Gama xoverdayîşê Guvene dewam kerdêne Zîndanê Tekîrdagî de tepişteyê dewaya PKK’yî Zulkuf Gezenî çalakîya fedaîye viraşte. Dima ra zî tepişteyanê bi nameyê Ayten Beçete, Mahsûm Pamay, Yonca Akinci, Sîraç Yuksel, Zehra Saglam û Medya Çinar çalakiyê fedaîyî viraştî. Nê çalakîyan serê Leyla Guvene de xeylî tesîrêko giran kerdibi. Zelal Bîlgîn a ke verê Leyla Guvene de bîye ê wextan ser o nê vatîbî: “Sere de ma xebera Zulkuf Gezenî girewte. Dimayê na xebere ra, merheleyêka newî dest pêkerde û weşîya aye hîna bîye xirabe. Nê xeberê ke zîndanan ra ameyî serê psîkolojîya embaze Leyla de tesir kerd. Vînayîşê merdimanê ciwanan tesîrêkê giranî aye ser o kerd ke aye mayêk a, cinîyêk a, xoverdayoxêk a. Çunke Leyla Guvene seba ke her kes biciwîyo û çew nêmiro dest bi çalakîye kerd û yew bi yew a keyeyanê tepişteyan fikrêna.”

Guvene çalakîyanê zîndanan ra dima eşkerayîyêk daye. Ard ziwan ke xoverdayîşêk esto û ganî her kes dorê xoverdayîşî de bêro têhet. Guvene dewam de nê vatîbî:

“Hevalanê ma çalakîyê fedaîyî viraştî. Heval Zulkuf, Ûgûr, Aytene. Ez vera çalakîyanê înan de bi rûmet bena çewt. Înan bi ruhêkê fedaîyî waşt ke bêvengîye bişiknê. La ez wazena bivaja, wa bêro zanayene ke her hevalêk bi nê çalakîyan parçeyêkê leşa mi ra, ruhê mi ra, zerrîya mi ra beno. Verê nê çalakîyan ez rêz gêna. Ma vanê, xora çalakîyêka ke ma dest pêkerda esta, xora ma mîyanê çalakîye de yê. Ma ameyê merheleyêka nêzdîya ke ma netîce bigêrê; gelê hevalan ganî ma dormeyê çalakwanan de ca bigêrê. Ma çalakîyanê neweyan nêkerê. Nê çalakîyê ke bi ruhê fedaîyî yenê viraştene zaf biqîymet ê. Merdim nêeşkeno derheqê înan çîyêk bivajo.  Labelê seke ma vat, hetê Rayberê Şarê Kurdî ra zî zaf reyan nê çalakîyî ameyî ercnayene. Ame vatene ke ‘Ganî şima merdişî ney, ciwîyayîşî bidê xo ver’. Ganî şima seba cuyêka bianore xoverdayîşê xo girdtir bikerê.”

Roja 174’ine ya çalakîya Guvene de tepişteyanê zîndanan eşkerayîyêk daye û da zanayene ke 15 tepişteyê dewaya PKK û PAJK’î do 30’ê Nîsane ra tepîya grevê vêşanîye açarnê bi rojeyê mergî. Rojeyê mergî yê 15 tepişteyan roja 7’ine de yo.

Zîndanê Bakirkoyî yê Cinîyan ê Girewteyî de Nesrîn Akgule, Şukran Aydine û Zozan Çîçeke, Zîndanê Gebze yê Cinîyan ê Girewteyî de Ardil Çeşme û Asli Dogane, Zîndanê Wanî yê bi Asayîşê Berzî yê Wanî de Ahmet Anigi, Ozhan Ceyhan, Vedat Ozagar, Îhsan Bûlût û Erol Cengîz, Zîndanê Amedî yê Tîpê D’yî de zî Ergîn Akhan, Enver Donmez, Ahmet Topkaya, Abdulhalik Kaplan û Ferhat Tûrgay rojeyê mergî de yê.