Ewro rojan ra 15’ê Sibate yo. Naye ra 20 serre aver, Rayberê Şarê Kurdî Abdullah Ocalan bi komploya mîyanneteweyîye ya ke bi serkeşîya emperyalîstanê rojawayî ameya amadekerdene, dewleta Tirke rê ame teslîmkerdene.  15’ê Sibate, hetê Kurdan ra sey ‘roja tarîye‘ ameye dîyayene û Kurdî 20 serre yo ke na roje de komploya mîyenneteweyîye şermezar kenê û seba azadîya Ocalanî çalakîyan organîze kenê.

Seba ke tecrîdê serê Ocalanî bêro wedaritene, dem bi dem çalakîyî ameyî viraştene. Grevê vêşanîye yê 12’ê Êlûle yê serra 2012’î roja xo ya 68’îne de reşt armnacê xo. Netîceyê grevî de tecrîd amebi wedaritene û Ocalan eşka keyeyê xo bivîno.

Nika zî bi heman armancî grevê vêşanîye dewam kenê. Hemsereka KCD’yî û parlamentera HDP’yî ya Colemêrgî Leyla Guvene, vera îşxalkerdiş û hêrişanê dewleta Tirke yê Efrînî beyanat dabi û naye ser ameyebî tepiştene. 7’ê Teşrîna peyêne de bi raya sîstemê veng û dîmenî (SEGBÎS) mahkeme de qisey kerd û seba ke tecrîdê serê Ocalanî bêro wedaritene, eşkera kerd ke a do dest bi grevê vêşanîye bikero.

GUVENE: TECRÎD ŞARÎ SER O YENO FERZKERDENE

Guvene bale ante rewşa mahkemaya Tirkî ser û va mahkemeyî girêdayîye otorîteyê. Guvene qerarê xo yê derheqê grevê vêşanîye wina kerd eşkera: “Xora bi tesîrê perspektîfê Birêz Abdullah Ocalanî mi bi hewayê aktîfî sîyaset de cayê xo girewt. Tecrîdkerdişê Birêz Ocalanî, tecrîdkerdişê yew şexsî nîyo, tecrîdkerdişê şarê Kurdî yo. Tecrîd sucê vera merdimahîye yo. Ez sey yew şexsê şarê Kurdî, seba ke tecrîdê serê Birêz Ocalanî şermezar bika dest bi grevê vêşanîye yê bêdem û bêdore kena. Ewro ra dima ez do mahkemeyan de xo nêpawa. Heta ke peynîya na bêhiqûqîye nêro û tecrîd nêro wedaritene, ez do çalakîya xo dewam bika. Eke hewce bikero, ez do çalakîya xo biaçarna bi roceyê mergî.“

XOVERDAYÎŞ PÊL BI PÊL BI VILA

Guvene eşkerakerdişê nê beyanatî ra yew roje dima dest bi grevê vêşanîye kerd. Guvene ya ke êdî nêeşkena rayîr ra şoro, nêeşkena binusno, nêeşkena biwano, nêeşkena temaşe bikero û bi zehmet qisey kena, hepisxane ra vete û seba ke bêro tedawîkerdene, erşawite nêweşxane. La Guvene tedawî qebûl nêkerd û şîye keyeyê xo. Leyla Guvene hepisxaneyî ra dima keyeyê xo yê Amedî de çalakîya xo domnaye û ewro kewte roja 100’yîna yê grevê vêşanîye. Grevê vêşanîye 16’ê Kanûne ra dima, hepisxaneyanê Tirkîya  de bîyî vila.

Destpêkerdişê grevê vêşanîye yê Guvene ra dima, Hewlêr de Nasir Yagız ê HDP’yî yî, girewteyê sîyasî yê hepisxaneyan, Strasbourg de sîyasetmedaranê Kurdan, Galler de Îmam Şîş, hemsereka DBP’yî Sebahat Tuncele, parlamentera HDP’yî ya verêne Selma Irmake dest bi grevê vêşanîye kerd. Çalakîya grevê vêşanîye ya ke bi serkeşîya Leyla Guvene de amebi destpêkerdene, pêl bi pêl bi vila. Nika 310 girewteyê sîyasîyê hepisxaneyan, welatanê cîya-cîyayan ê Ewropa de bi desan kesî grevê vêşanîye de yê. Çalakîye kewta rojdemê Kurdîstan, Tirkîya û dinyaye.

EZ XO TECRÎDKERDE VÎNENA

Leyla Guvene roja çalakîya xo ya 4’îne de beyanat dabi ANF’yî û wina vatbi: “Mi bi îdeolojîyê cînîya azade yê Birêz Ocalanî xo nas kerd. Naye ra zî ez tecrîdê serê ey, sey tecrîdê serê xo vînena. Çalakîya zindanê Amedî, herikîyayîşê tarîxî vurna. Mi bi hurmetê ey qehremanan dest bi grevê vêşanîye kerd.

QEDEXE Û CEZAYÊ DÎSÎPLÎNÎ

Dewlete verî bi qedexekerdişî cewab da çalakîya Guvene. Walîtîya Tirkî ya Amedî 16’ê Teşrîna peyêne de çalakîyê ke seba Leyla Guvene do bêrê kerdene qedexe kerdî.  Pey cû, îdareyê hepisxaneyî yew menge, cezaya dîsîplînî Leyla Guvene rê birne. Nê qedexeyî ra dima Wan, Colemêrg, Edene û Riha de seba ke paştdarîye bidê Leyla Guvene çalakîyê vêşanîye ameyî destpêkerdene û nê çalakîyan 2 rojî dewam kerd. Na çalakîye ra dima 10 parlamenteran Meclîs de, 2 rojî çalakîya grevê vêşanîye viraşte. Parlamenterê bînî zî Wan, Amed, Riha,Mêrdîn, Mersîn û Edene de 3 rojî kewtî grevê vêşanîye.

Guvene wexto ke hepisxane de grevê vêşanîye de bîye maya aye wefat kerd. Seba ke weşîya ci cade nêbîye, îdareyê hepisxaneyî waşt ke bi wesayîtê rîngî şoro merasîmê cenazeye, la Guvene qebûl nêkerd û beşdarê merasîmê cenazeya maya xo nêbîye. Naye ser Guvene maya xo rê yew mektube nuşte. Guvene mektuba xo de wina va: “Ma xeylî çîyê ecêbê ke nênê ciwîyayene vînenê. Ma ra vanê ‘kinc û kolê ke ma daye şima bidê xo ra, yan zî viran bimanê‘.

BEDELÊ XO ÇI BENO WA BIBO MA DO SER BIKEWÊ

Guvene mîtîngê 19‘ê Çele yê HDP’yî yê Amedî yo ke seba grevanê vêşanîye amebi viraştene rê yew mektube erşawite. Guvene mektuba xo de wina va:“No şar o xoverdayox, cinî û ciwanê îradeyê demokrasî û azadîye, ewro rolê xo yê vera zaliman ê sey Dehaqî anê ca. No îrade bedelê ci çi beno bibo, do ser bikewo. Bi bawerî û îradeyê xo, ma do nê xoverdayîşê xo bikerê serkewte.“

PLANÊ DEWLETE YÊ SEBA ŞIKITIŞÊ XOVERDAYÎŞÎ

Dewleta Tirke xoverdayîşê Leyla Guvene û çalakwananê bînan peygoş kena û no derheq de heta nika qet yew beyanat nêdayo û kesî de nêkewta dîyalog,seba ke xoverdayîşî bişikno game eşte. 12’ê Çele de birayê Ocalanî Mehmet Ocalan berd Îmralî, bi pêvînayîşê 15 deqayan waşt ke vajo tecrîd çin o. La Leyla Guvene û xoverdayoxanê bînan no kayê dewlete dî û qerarê dewamkerdişê xoverdayîşî girewt.

Bi no qeyde 25’ê Çele de mahkemaya Guvene ameye dîyayene. Guvene û avukatê ci nêşîyî mahkema. Na mahkame de qerarê serbestveradayîşê Guvene ame dayene. Guvene no qerar sey qeraro sîyasî yo ke wazeno xoverdayîşî bişikno dî û va, talebanê mi rê cewab nêameyo dayene, coka ez çalakîya xo do keyeyê xo de dewam bika.

GUVENE PARLAMENTOYÊ EWROPA RÊ MEKTUBE NUŞTE: BI ROLÊ XO YÊ ÇARESERÎYE RAWIRZÊ

Guvene roja grevê vêşanîye yê xo yê 84’îne de Serekê Parlamentoyê Ewropa  Antonîo Tajanî rê,serekanê grûbanê sîyasîyan ê Parlamentoyê Ewropa rê yew mektube erşawite. Guvene waşt ke wa vera tecrîdî tebigerê û wina va: “ Ez hêvî kena ke vera polîtîykayanê îzolekertdişî yê dewleta Tirkî ya ke endama YE’yî ya, şima bêveng nêmanenê. Grevê vêşanîye waştişê tek kesî nîyê. Hepisxane û teberê welatî de seyan kesî kewtê girevê vêşanîye. Na çalakîye seba heqanê merdimahîye ya û zaf muhîm a.“

WAŞTENA MI WAŞTENA KOMELÎ YA

Guvene menga diyîne ya çalakîya xo de beyanat da rojnameyê Yenî Ozgûr Polîtîka û wina va: “ Tek armancê mi wedaritişê tecrîdê serê Birêz Ocalanî yo. Her çalakîya ke seba Birêz Ocalanî yena kerdene, wayîrê yew armancê komelkîyî ya.Naye ra zî çalakîya mi, heman wext de çalakîya mîlyon kesan a. Wezîfeyêko giran ma ver de esto. Yan ma do îradeyê xo nîşan bidê û nê prosesî de bi mucadele ser bikewê, yan zî ma do se serra bîne bivindê. Ma do şarê xo mekerê mahkumê se serra bîne.“

Guvene 55 serrî ya û 100 rojî yo ke grevê vêşanîye de ya. Bi çalakîya xo kena ke her kesî motîve bikero û peyamê xo biresno her çalakîye. Bi giranîya weşîya xo, reyna zî nêvindena û cewab dana persanê medya.

Guvene roja Sêşemeye de peyamêko dîmenkî erşawit kombîyayîşê HDP’yî yê Meclîsî û wina va: “ Vengê xoverdayîşê ma roj bi roj beno berz. Êyê ke nêwazenê biheşnê zî naye ver benê aciz. Naye ra zî çalakîya ke şima vizêrî Stenbol de kerde, zaf bimane bîye. Êdî şansê înan çin o ke vajê ‘Ez do nêverda ke şima filan çiyî bikerê‘. Çunke şima gefan ver uca de bîyî û xover da. Ez şima pêroyînan bi zerrî û can maçî kena. Ez bawer a ke no xoverdayîş do ser bikewo. No rayîr de beno ke tayê kesî biginê war o, la çîyo muhîm serkewtişê armancî yo. No derheq de ez şima û şarê xo ra paştrast a. Ma do miheqeq ser bikewê. Ez şima bi heskerdiş selam kena.“

NÊVERDA BÊRO DERMANKERDENE

Rewşa weşîye ya Guvene giran a. Vizêrî nê pereyî heyetêko mîyanneteweyî şî zîyaretê aye. Zîyaretî ra dima rewşa Guvene bîye girane û Guvene berde nêweşxane. Leyla Guvene ya ke hişê xo serê de bî, tedawî qebûl nêkerd. Kontrolî ra dima waşt ke şoro keyeyê xo. Naye ser nêameyê dermankerdene û erşawîyaye keye.