Protestoyê vera destsernayîşê şaredarîyanê DEM Partî yê Êlih, Mêrdîn û Xelfetî roja çarine de dewam kerd.

Verê Şaredarîya Êlihî de ya ke tede qeyûm ame cakerdene û ameye xespkerdene, şaro ke vera xespkerdişê îradeyî xover dano raştê hêrişê polîsan ame. Polîsan bi awa tazîkin û gazê îsotî hêriş kerd. Ciwanan bi fîşeganê hewayî û kerrayan cewab da polîsan.

Badê hêrişê polîsan şarî Kuçeyê Komando û Gulîstane de dest bi xoverdayîşî kerd. Komêke zî Hîrgoşê Çapemenîye de cewab da hêrişê polîsan. Şarê kê bi govende qeyûm protesto kerdêne raya diyînî raştê hêrişê polîsan ame. Şarî bi sloganan  cewab da û newera barîkatî nayî ro. Hemşaredarê Êlihî ke wezîfeyê ci ame xespkerdene Gulistane Sonuk û Yeşil Işik zî tede şarî bi rayraşîyayîşî hêrişê polîsan protesto kerd.

Xelfetî de kombîyayîşê Meclîsê Şaredarîye verê banê şaredarîye ke binê ablûqa de ya, hetê hemşaredaran Mehmet Karayilan û Saniye Bayram ra ame kerdene.  Wekîlê DEM Partî yê Aytene Kordu, Mîthat Sancar, Ferit Şenyaşar, Hemserekê Pêroyî yê ÎHDyî Ibrahim Kuçukbalaban zî tede xeylêk kesan kombîyayîş seyr kerd.

Hemşaredar Mehmet Karayilanî vat: ''Semedê ma her ca şaredarîye, her ca meclîs o. Heta ke qeyûmo ceberut şiro ma do xover bidê.'' Saniye Bayram zî vat: ''Ma badê 8 serran şaredarîya xo qeyûmî ra xelisnaye. Ma do şaredarîya xo nê talankaran rê meverdê.''

Mêrdîn de vera derbaya qeyûmî verê  Şaredarîya Bajarê Pîlî de xoverdayîş bêmabên şewe roje dewam keno. Hemşaredarê Mêrdînî Ahmet Turk û Devrime Demir, Hemserkê Pêroyî yê DBPyî Keskin Bayindir, wekîlê DEM Partî, TJA, Meclîsê Dayîkanê Haştîye û xeylê kesan nobete zîyaret kerd.

Devrîme Demir ke tîya qisey kerd nê vatî: ''Çimê qeyûmî piranê şarî de yo. Qeyûm îşxal o. Heta ke ma heqê xo peyser bigîrê ma do kuçeyan de bê. Ma do çîyo ke yê ma yo bigîrê û qeyûmanê dizdan bişawê.''

Bayindir zî vat: ''Bi qeyûman ma ra çi wazenê? Wazenê ma ziwan, kultur, nasname, welatperwerîye û anorê xo caverdê?  O wext wa biwanê tarîxê ma ra. Şarê kurdî tim wayîrê îradeyê xo vejîya, do bivejîyo. No xoverdayîş cewabo tewr gird o.''