Protesoyê vera destsernayîşê şaredarîyanê DEM Partî yê Êlih, Mêrdîn û Xelfetî roja hirêyinî de dewam kenê.

Êlih de şaro ke Parka Yilmaz Guneyî, Taxa Kulturî û Kuçeyê Seyid Bilalî de ame têhet bi çepik, tîlîlî û sloganan hîrê hetan ra dest pê rayraşîyayîşî kerd. Hemserekê Pêroyî yê DBPyî Keskin Bayindir, hemşaredarê Êlihî ke wezîfeyê ci ame xespkerdene Gulistane Sonuk û Yeşil Işik û temsîlkarê xeylê dezgehanê komelê sîvîlî tewrê rayraşîyayîşî bîyî.

Rayraşîyayîş de sloganê sey "Bijî serok Apo", " Be serok jiyan nabe", "Kürdistan goristan ji bo faşistan", " Bijî berxwedana gele Kurd","Bijî serok Apo" û "Ma do bi xoverdayîşî ser bikewê" ameyî vatene. Derûdorî ra şarî bi çapikan paştî daye. Şaro ke resa Hîrgoşê Çapemenîye bi anonsî veng kerd nuqtaya polîsan û vat Şaredara ma ra vejê.

Tîya eşkerayîye ameye dayene. Wekîla DEM Partî Sebahate Erdogan vat: ''Heta ke no qeraro leymin, bêhuqûq o ke îradeyê şarê kurdî nas nêkeno,  peyser mero girewtene, ma sey şarê Kurdîstanî do payan ser bi. Ma do bi xoverdayîşî ser bikewê. Ma tîya de yê, payra yê, xover danê. Ma do miheqeq ser bikewê.''

Mêrdîn de zî şarê ke verê Şaredarîya Bajarê Pîlî de nobete daye destpêkerdene qezaya Qoserî de rayraşîyayîş kerd. Wekîlê DEM Partî yê Mêrdînî, Hemşaredarê Mêrdînî Ahmet Turk û Devrime Demir û bi seyan kesî heta Meydanê Azadîye rayra şîyî.

Tîya Ahmet Turkî qisey kerd û vat: ''Ma vera zîhnîyetê ke îradeyê şarî girewto binê îpotekî  yewîya demokratîke biafirnê û bi vengê berzî îtîrazê xo vila bikerê.''

Xelfetî de zî xoverdayîşê şarî dewam keno. Hemserkê Pêroyî yê DEM Partî Tulaye Hatimogullari û Tuncer Bakirhan, Hemvervatoxa HDKyî Meral Daniş Beştaş, Hemsereka Pêroyî ya DBPyî Çigdeme Kiliçgun Uçar û EHP, TOP, TİP, EMEP, SMF, SYKP, SODAP, KKP, PİA, Partîya Şorişgêre, ESP, İHD, Federasyonê Alevi Bektaşî, KESKî ra xeylêk kesî ewro ameyî Xelfetî. Heyetê bi coşî ameyî pêşawazî kerdene û dima ra şar bi sloganan şi verê şaredarî.

Bakirhanî ke tîya qisey kerd wina vat: ''Înanê ke Êlih, Xelfetî û Mêrdîn de qeyûm ca kerd, ê dîyalogî nêwezanê.Eke şima raşta çareserîye wazenê kurdî tîya de yê, Imrali ûca de yo.Eke şima haştîye wazenê qeyûmî caverdê.''