Grevê vêşanîye yê Strasbourgî ke hemserekê KCDK-E’yî Yuksel Koç zî tede 14 çalakwanî danê domnayene kewt roja xo ya 52’ine.

Çalakwanê ke 51 rojî yo welatanê cîya cîyayan ra bi hezaran kesan zîyaret kerdî, çend şino rewşa weşîya înan xirabêr bena. La rixmê naye bi qerardarîya girde çalakîya xo rê dewam kenî û zîyaretkeranê xo rê eleqedar benî.

Vizêr reyna bajaranê Bern, Aarau û Zurîhî yê Swîsre û Hamburg, Koln, Bremen, Kassel, Heilbronn û Pforzmheimî yê Almanya ra xeylî kesan çalakwanî zîyaret kerdî. Hetê bînî ra temsîlkaranê Partîzanî ra zî grûbêk xoverdayoxî zîyaret kerdî û paştî daye înan.

KESÊ KE GREVÊ VÊŞANÎYE DE YÊ KAM Ê?

Seba ke tecrîdê serê Rayberê Şarê Kurdî Abdullah Ocalanî bêro wedartene, kesê ke grevê vêşanîye de yê wina yê: Hemserekê KCDK-E‘yî Yuksel Koç, parlamentera HDP‘yî ya Riha ya verêne Dîlek Ocalane, sîyasetmedar Mustafa Sarikaya, rojnamegere Gulîstan Çîya Îke, Nurgûl Başarane, Ramazan Îmîr, Mehmet Nîmet Sevîm, Mohamad Ghaderî, Denîz Surgut, Ayvaz Ece, Kardo Bokanî, Kerem Solhan, Agît Ural û Ekrem Yilmaz.