OHP‘yî bale ante ser ke, girewteyê ke Herêma Marmarayî de grevê vêşanîye de yê benê hedefê zext û kerdişanê keyfî yê îdarekaranê hepisxaneyî. OHP'‘yî waşt, tecrîdê Îmaraliyî desinde bêro wedaritene.
Komîsyonê Girewteyan ê Platformê Huqûqnasanê Azadîperweran (OHP) yê Beşê Stenbolî raporê Çele ye 2019’î yê hepsxaneyanê Herêma Marmara eşkera kerd.
Vervatoxa komîsyonî Raziye Tûrgûte eşkera kerd ke Herêma Marmarayî de nêzdîyê 100 girewteyî grevê vêşanîye de yê û bale ante serê zext û zordarîya ke îdarekaranê hepisxaneyan çalawananê grevê vêşanîyerê kenê. Turgute ard ziwan ke netîceyê grevê vêşanîye de fekê tayê çalakwan de kulî û zaf kîlovîndîkerdiş vejîyayê meydan.
DOKTORÎ KONTROLAN NÊKENÊ, KARBONAT NÊNO DAYENE
Rapor de ame vatene ke îdarekarê hepisxaneyî vîtamînê B‘yî û karbonatî nêdanê girewteyanê ke grevê vêşanîye de yê û vat, girewteyî roja Şeme û Yewşemeyî nêvetê revîr, îdareyî her roje şeker û leymûne dayê la karbonat nêdayo û roje de teyna hebêk B12 ameyo girewtene.
Goreyê raporî, Hepisxaneyo Girewte yê Tîpê T‘yî ê Duzceyî yo ke zaf reyan tim bi binpankerdişê heqanê merdimanîy rojdem de yo, teyna hemşîreyî kîlo û tansîyonê girewteyanê grevê vêşanîye de yê kontrol kenê, la heta nika hetê doktoran ra nêameyê kontrolkerdene. Hetê bînî ra ame vatene ke vîtamînê B1‘î nêno dayene û girewteyo bi nameyê Sulyeman Benzer dima kewtişê grevê vêşanîye, erzîya hucreya yew kese.
ÇALAKWANAN RÊ ŞIDET YENO KERDENE
Raporî de ame vatene ke, Hepisxaneyo Girewte yê Tîpê F‘yî yê Edîrne de, 2 eskeran seba berdişê dozgerî, girewteyanê bi nameyê Kemal Argiş û Adem Arslan bi zor û şidet koguş ra dayê vetene û înan rê nêng çînayî û heqert kerdo.
Reyna ame vatene ke girewteyo bi nameyê Zerdeşt Odûncû yo ke 23'ê Kanûne 2018'î de dest bi grevê vêşanîye yê bêdem û bêagêrayîşî kerd, roja verî ra nat doktoran o kontrolê nêkerdo û nêno zanayene ke çend kîlo vîndî kerdo.
Rapor de ame vatene ke goreyê vatişê çalakwananê grevê vêşanîye Ozlem Ozdemîre û Ayten Gulsume yê ke Hepisxaneyo Girewte yê Cinîyan ê Gebze de yê, fekê tayê çalakwanan de kulî vejîyayê, Ruhşen Bozane de ziwayîya cermî dest pêkerdo.
Hepisxanayê Kandira de girewteyo bi nameyê Îbrahîm Kaya yo ke grevê vêşanîye de yo 10 kîloyî vîndî kerdî û netîceyê grevê vêşanîye ra problemê weşîye yê bînî zî hêdî-hêdî vejîyayê meydan.
GANÎ WAŞTIŞÊ GIREWTEYAN BÊRÊ QEBÛLKERDENE
OHP’yî vendgayîş îqtîdarê sîyasî kerd ke, seba rewşêka hîna xirabêr nêvejîyo ganî waştişê girewteyan bêrê bicaardene û vat: “Waştişî eşkera ye. Wedariştişê tecrîdê Îmaraliyî û heme tecrîdê hepisxaneyan ê.“
