Vizêr polîsanê tirkan eşt Komeleya Cigêrayîşê Kultur û Kulturê Mezopotamya (MED-DER), Payîz Pirtûkî ser û Kooperatîfê Ziwan û Hunerî yê Anka ser. 25 kesî operasyon de ameyî destbendkerdene. Hemsereka DBPyî ya Amedî Sultane Yaray ANFyî rê nê teda û hêrişê vera ziwan û kulturê kurdan ercnayî.

Sultane Yaray vist vîrî ke  MED-DER de kursanê neweyan dest pêkerdo, eleqeyê seba kurdkî zaf bîyo coka qeydî heta 25ê êlule ameybî dergkerdene û  vat: ''Bi nê operasyonê vizêrînî eşkera bi ke tehamulê vera kultur û ziwanê kurdan çin o. 100 serrî yo vera kultur û ziwanê kurdan asîmîlasyon dewam keno la nê rojan de no zêdîya. Esterîyayîşê tabelayanê kurdkî û nuşteyanê kurdkî, operasyonê vera dezgehanê ziwanî naye ra yê.

Verê cû zî yew reye hêrişê KURDÎ-DERî ameybi kerdene û 36 cayê ci reyêke de ameybî qefilnayene. Dima MED-DER ame akerdene la o zî tim hedefê hêrişan de yo. Bi taybetî mamostayê MED-DERî tim raştê hêriş û operasyonan yenê la ancî zî têkoşînê xo ra fek vera nêdanê. Teda û hêrişî çendek bizêdîyê zî kurdî do nasname, ziwan û kulturê xo ra fek vera nêdê. Vera kurdan sûcê asîmîlasyonî û polîtîkayê çinkerdişî yenê kerdene. Ma ney qebul nêkenê. Sereştişan de rixmo ke qedexe nîyê dest nîya xeylê kitab û kovaran ser. Ma do vera nê kerdişan wayîrê ziwan û kulturê xo vejîyê.''

Sultane Yaray vist vîrî ke 25 kesî bi îfadeyanê îtîrafker Umît Akbiyikî ameyê destbendkerdene û vat: ''Xora na bahaneya operasyonî ya. Sebebê nê pêro tedayan tecrîd o. Heta ke tecrîd nêqedîyo hêrişê vera ziwan û kulturê ma do dewam bikerê. Coka armancê ma yo verên şiknayîşê tecrîdî yo. Seba ke Birêz Ocalanî de têkilîye nêna ronayene polîtîkayê şerê taybetî zî zêdîyenê. Naye ra ganî ma vera tecrîdî vengê xo vejê û wayîrê ziwan, tarîx, kultur û nasnameyê xo vejîyê.''