Gokhan Yildirim taxa Gazî ya Îstanbulî de seba ke serê ci de madeya tîryakî vejîyabî, cezaya zîndanî ya 46 serran dîyabî ci. Yildirim bi waştişê muhakemekerdişê edîlî 221 rojî yo rojeyê mergî de yo. Erkan Yildirim Zîndanê Tekîrdagî de birayê xo Gokhan Yildirim zîyaret kerd.

Erkan Yildirim derheqê rewşa birayê xo de ANFyî rê qisey kerd.

Yildirimî pare kerd ke tewr peyêne çarşemeyê vîyarteyî de ey birayê xo zîyaret kerdo û bale ante ser ke her ke şino rewşa birayê ci bena xirabêr. Yildirimî dîyar kerd ke demarê dest, ling û pirnikê birayê ci mor bîyê û bedenê ci de birînî virazîyayê. Erkan Yildirimî vat: ''Birînanê destê xo ra birayê mi hînî nêeşkeno mektub binuso. Dejê bedenê xo ra nêeşkeno şewan rabikewo, nêeşkeno rayîr a şoro, kursîyê bitekerlekî şuxilneno. O pê sandalyaya bitekerlekî  ame pêvînayîşî.''

Yildirimî vist vîrî ke birayê ci Gokhan û Sîbele Balaç rojeyê mergî de yê û vat: ''Ê wazenê bi hawayêkê edîlî bêrê muhakemekerdene. No waştiş dewleta huqûqî de normal o. Ê wazenê peynîya muhakemekerdişê bi îsbatanê dîjîtalan û nimiteyan, îtîrafkeran bêra, qanûnê cezaya muebeda girankerde wedarîyo, heq û azadîya tepişteyan nêrê astengkerdene.''

Yildirimî pê hesna ke Sîbele Alaç bîya 48 kîlo û Gokhan zî bîyo 42 kîlo. Yildirimî îfade kerd ke hînî wextê birayê ci zaf nêmendo. Yildirimî venga her kesî da ke wayîr vejîyo waştişê wird tepişteyan û vat: ''Sîbele Balaç û birayê mi seba ke waştişê înan ê meşrûyî bêrê caardene roje bi roje sey vewre helîyenê. Ganî cade waştişê înan bêrê caardene.''