Fermandarîya Pêroyî ya YPJî da pêhesnayene ke hêrişê hewayî yê dewleta tirke yê vera Kobanê de şervanî Arîne Kobanê û Sorxwîne Celal şehîd bîyî û û nê vatî:

''Hêrişê dewleta tirke ya qirkere yê vera herême dewam kenê. Dewleta tirke hêrişê şervananê ma, şarê ma yê welatperwerî û serkêşanê şorişî kena. 3ê nîsane de Kobanê de hêriş kerd. Hêriş de hemrayê ma Arîne Kobanê û Fermandare Sorxwîne Celal şehîd bîyî. Ma şehîdanê xo bi rêzdarî yad kenê û keyeyanê ci yê welatperweran, şar û hemrayanê xo rê serweşîye wazenê. Ma do qesasê nê heme hêrişan bîgerê.

Arîne Kobanê

Embaza ma Arîne Kobanê keyeyêkê welatperwerî de yena dinya û bi kulturê welatperwerîye bena pîl. Hema ciwanîya xo de têkoşînê şorişî de cayê xo gena. Semedê pawitişê şarê xo bena mîlîtanêka nimûne. Heme hemleyan de ca gena û  wezîfeyê xo bi serkewtişî ana ca.

Sorxwîne Celal

Hemraya ma Sorxwîne Çele de keyeyêkê welatperwerî yê eşîrê Pinyanişî de yena dinya û bi kulturê kurdan bena pîle. Serhildananê kuçeyanê Çele de aktîf ca gena. Kobanê de vera çeteyanê DAÎŞî şer kena û heta şehadetê xo Til Berak, Til Hemis, Hesekê  Serêkanîye de şeran rê serkêşîye kena û heme hemleyan de ca gena. Hemraya ma Sorxwîne şerî de çimêkê xo vînî kena û xeylêk rey brîndara bena. Hemraya ma Sorxwîna ke zerrîya ci girde bî hetê heme embazanê xo ra zaf ameyêne heskerdene.

Ma do rêçê şehîdanê xo de têkoşînê xo xurt bikerê û waştişê şehîdanê xo bi serkewtişî tacîdar bikerê. Wa şarê ma wayîrê dewaya şehîdanê xo bivejîyo. Wa şarê vera hêriş û kayanê xayînîye yê dişmenî hîşyar bo tewiro ke hewce keno ramojno.''