Grevê vêşanîye yê ke seba wedaritişê tecrîdê serê Rayberê Şarê Kurdî Abdullah Ocalanî bi serkêşîya Leyla Guvene dest pêkerdîbî 1’ê Adare de heme zîndanan de vial bîyî. Dimayê xoverdayîşê grevê vêşanîye ra zext û îşkenceyê ke zîndanan de yê hîna bîyî zêde. Yew zîndano ke tede zextî asta tewr berze de yê Zîndanê Kirikkaleyî yo. Ayetullah Ayo ke nê zîndanî de yo bi rayîrê keyeyê xo qalê zextan kerd.

Ayo ke bi rayîrê maye û birayê xo ard ziwan ke zextî bîyê zêde, vat o û embazêkê êyo ke grevê vêşanîye de yo ameyê şirawitene hucrayêk. Ayo ke hetê gardîyanan ra cilê ci ameyê dirnayene û kitabe ci ameyê perçekerdene, vat ke ê rastê heqaretê wezîfedaranê zîndanî ameyê. Ayî vat îdareyê zîndanî seba ke ê fek grevê vêşanîye ra vera bidê zextê xo hîna kerdê zêde.  

Keyeyo ke şi pêvînayîş zî ard ziwan ke ê rastê heqaret û zulmî ameyê. Keyeyê Ayî yo ke wextê cigêrayîşî de rastê muameleye xirabî yê wezîfederanê zîndanî ameyê, gama ke nê halî rê îtîraz kerdo wezîfedaran înan ra vato, “Vengê xo mevejê, fermanê Wezaretê Edaletî wina yo.” Keyeyo ke bale ante serê zextanê ke tepişteyanê zîndanan ser o yenê bicaardene seba hîsdarîye veng da rayapêroyîye.