Zextê serê girewteyan ê ke 1’ê Adare ra nata seba wedaritişê tecrîdê girankerdeyî yê serê Rayberê Şarê Kurdî Abdullah Ocalanî veng da vengê xoverdayîşê Leyla Guvene her ke şino zêde benê.

Hepisxaneyan ra yewo ke îşkence û zextî tede giran benê Hepisxaneyê Sîlîvrî yê Hûmara 5’in o û nêzdîyê 200 girewteyê PKK’yî vera tecrîdî grevê vêşanîye de yê.  Gruba verêna ke dest bi grevê vêşanîye kerdo roja 132’ine de ya, girewteyê bînî zî 1’ê Adare ra nata xoverdayîş de yê. Girewteyanê ke bi rayîrê keyeyan zextê ke bi înan yenê kerdene dayî zanayene, bale ante serê persanê weşîye yê hemrayanê xo yê ke grevan de yê.   

Girewteyan da zanayene ke, girewteyî persanê gonî viritene, vîndîkerdişê hafiza û kemasîya têgêrayîşî ciwîyenê. Seba ke destûr nêno dayene mabênê qawîşan de têkilîye nêna ronayene û coka derheqê weşîya çalakwananê grevê vêşanîye de zanayîşî nênê girewtene. Hepisxaneyan de Tv, radyo, rojname û kovarî nênê dayene. Keyeyê ke wazenê nêzdîyanê xo ra xeberan bigêrê zî înan rê her tewir astengîye yena vetene.