Tepişteya sîyasîye ya kurde Zeynebe Celalîyan Zîndanê Qereçekî de roja şemeyî dest pê grevê vêşanîye kerd. Zeynebe Celalîyan hewteyê vîyarteyî de dabi zanayene ke eke Zîndanê Qereçekî de bimano do dest pê grevê vêşanîye bikera. Heman wextî de waşt ke  tepişteyê sîyasî yê ke pê vîrusê Korona kewtî wa teberê zîndanî de bêrê weşkerdene.

Torra Heqanê Merdiman a Kurdîstanî pare kerd ke erşawîyayîşê Zîndanê Qereçekî ra dima têna rayêke Zeynebe seba weşkerdişî ameye berdene bi nêweşxane. Doktoran ard ziwan ke Zeynebe pê vîrusê Korona kewta û vîrus pişê ci de vila bîyo. Doktoran îfade kerd ke rewşa ci hol nîya û beno ke tede tengîya nefesî peyda biba.

Torre eşkera kerd ke tepişteyanê sîyasan ê kurdan ê Zîndanê Qereçekî Suheyla Hêcan û Sakîne Perwane zî dest pê grevê vêşanîye kerd. Her di tepişteyanê kurdan zî waşt ke şorê zîndanê Evînî. Seba ke rewşa ci ya weşîye hol nîya Sakîne Perwane zî erşawîyaye merkezê weşîye yê zîndanî.