Jean Ziegler o  Sosyolog Nuştox yo  ke embazê rayberê şorişgêrî yê Amerîkaya Latînî Che Guvera û Hetkarê Heyetê Şewirmendî yê Heqanê Merdiman ê Neteweyê Yewbîyayeyî (NY) yo derheqê grevê vêşanîye yo ke rayberîya Leyla Guvene de destpêkerd  û xeylî babetanê bînan de ANFyî rê qisey kerd.

'NO XOVERDAYÎŞ ZAF MUHÎM Û BIRÛMET O'

Zieglerî  ard ziwan ke o paştî dano xoverdayîşê grevê vêşanîye û va: ‘‘  Xoverdayîşê Guvene û embazanê ci zaf bimana û birûmet o. Ganî waştişê înan cade bêrî caardene.  Tena wa tecrîd wemedarîyo, ganî Ocalan bêro azadkerdene.‘‘

Zieglerî vist vîrî ke rewşa weşîya Leyla Guvene kewta merhaleyêka krîtîke û wina dewam kerd:  ‘‘Ganî Ewropa û rojawan vera waştişanê Guvene bêvêgn memanê. Ganî hukmat û dezgehê Ewropa vera naye tê bigêrê. Wa peynîya polîtîkayanê paştîdayîşê Ergodanî bêro û paştî bidîyo Kurdan.‘‘

'DEWLETA TIRKÎ VERA MERDIMÎYE SUC KENA'

Zieglerî dewleta Tirkî sey faşîst name kerde û best pa: ‘‘Dewleta Tirkî eşkera vera merdimîye suc kena. Caardişê ke şarê Kurdî rê kena çarçiweya sucanê şer û merdimîye de yê. Demo peyên de belgeyê sucanê înan zî eşkera vejîyenê meydan.  Vera ney bêvêng mendiş raşt nîyo.‘‘

'GANΠ NY LEZ Û BEZ TIRKÎYA SER O RONIŞTIŞÊK VIRAZO'

Zieglerî  nêzdîbîyayîşê Neteweyê Yewbîyayeyî (NY) yê Tirkîya rexnê kerd û vat ke ganî Konseya Heqanê Merdiman a NY’î  lez û bez Tirkîya ser o roniştişêko taybet organîze bikero. Zieglerî wina dewam kerd:‘‘  Erdogan qanûnanê mîyanneteweyîye çîn hesibneno.  Vera Kurdan û muxalîfan suc keno. La NY bêvêng o.  Ewro tecrîd û îşkence yo ke Ocalanî ser o yeno bicaardene suc o. Tecrîd û îşkence sucê merdimîye yê. Ganî NY vera faşîzmê Tirkî çîyêk bikero. Ocalan rayberê Kurdan o û ganî cade serbest bêro veradayene. Çîyêkê Kurdan rê bênê goreyê qeydanê mîyanneteyewîye suc o. Ganî her kes  vera naye vengê xo berz bikero û paştî bido xoverdayîşê Kurdan. Kurdî ganî çar perçeyan de wayîr Kurdistanî bî û heme hêzê mîyanneteweyîye naye nas bikerê û paştî bidê ci. Herra Kurdan Efrîn hetê dewleta Tirkî ra ameya işxalkerdene. NY û hêzê mîyanneteweyîye qey vera naye bêvêg ê? Ganî Efrîn azad bo.''

'PKK TÊGÊRAYÎŞÊ AZADÎYE YO'

Zieglerî qiseykerdişê xo wina qedîna: ''Xeylî dewletê rojawanî PKK‘yî sey teror vînenê. Çîyo winayên nêno qebûlkerdene.  Eke ewro DAÎŞ vînî kerdo no xeyrê Kurdan û bitaybetî zî xeyrê cinîyanê Kundan de bîyo. Wa çew naye ra xo rê pare mevejo, no serkewtişê Kurdan o. PKK yew têgêrayîşê azadîye yê neteweyîye yo û rayberê ci Birêz Ocalan o. Coka ganî Ocalan azad bo.  Rojawan ganî paştîdayîşê Erdoganî caverdo û semedê werêardişê PKK û dewleta Tirkî rolek bigêro.‘‘