Serkan Tumay wexto ke Zîndanê Manîsa de cezaya xo ya 5 serran temam kerdbi la pabeyê qedîyayîşê cezaya xo ya dîsîplînî bibî. Nê mîyanî de mabênê Serkan û gardîyanan de tay meseleyî qewimîyayî.

Keyeyê Tumayî da zanayene ke gardîyanan di hewteyî verê cû Serkan berd noqatayêka kore, da piro, sere û destê ey şiknayî û ci rê gef wend ke çewî ra qala naye nêkero. Embazê hucreyî yê Serkanî Hakan Ecevîtî telefon de dadîya xo rê vat ke rewşa Serkanî hol nîya û ganî xebere bida keyeyê Serkanî. Gardîyanî pê hêrs bîyî ke xebera keyeyî pê nê îşkenceyî bîya û Hakan erşawit odaya yewkesî.

Keyeyê Tumayî 29ê êlula 2020î de muracatê Dozgerîya Komare ya Kirikkale kerd ke cuya Serkanî binê tehlukeyî de ya la dozgerîye tehqîqatêk akerd la cade derheqê tehqîqatî de bire daye ke hewceyê teqîbî çin o.

Serkan Tumayî zî keyeyî xo rê îfade kerd ke rewşa ey cidî ya û ganî cade sewqê zîndanê bînî bibo. Di rojan ra dima îdareyê zîndanî keyeyê Tumayî rê vat ke Serkan waqayêka edlî ra merdo.

Birayê Serkan Tumayo ke zîndan de kişîya Hakan Tumayî vat ke înan verê cû muracatê dozgerîye kerd û gerreyê îşkenceyî kerd la dozgerîye bira 'bêteqîbverdayîşî' daye. 

Hakan Tumayî vat: ''Raporê otopsî de 'mergê edlî' nuseno. Ê wazenê na mesele mîyan bikerê. Dişmenê birayê mi çinbi. Tepişteyanê zîndanî vatêne ke 'Mergêko normal nîya, wa cigêrayîş bêro kerdene.' ''