Weqfa Heqanê Merdiman a Tirkîya (TÎHV), Komeleya Heqanê Merdiman (ÎHD) û Yewîya Tabîbanê Tirkan (TTB) bi wesîleya 26ê Hezîrane Roja Paştdayîşê bi Kesanê Ke Raştê Îşkenceyî Ameyê eşkerayîyêka hempare daye. 

TÎHV, ÎHD û TTByî da zanayene ke 2022 de zîndanan de 83 mergê şikdarî qewimîyayê û nezaretan de zî 4 hezar û 275 kesî raştê îşkence û muameleya xirabe ameyê.

Eşkerayîye de dîya zanayene ke îqtîdarî pêro welat vurnayo warê îşkenceyî û seba ke verê îşkenceyî bêro girewtene ganî polîtîkaya cezanêkerdişê faîlan ra bêra teriknayene. Eşkerayîye de wina ame vatene: ''Ganî îşkence pê vateyan nêro teşwîqkerdene, selahîyetdarî wasfê îşkence û îşkencekeran nêdê û vera îşkenceyî vejîyê.

Eşkerayîye de doneyê serê îşkenceyî wina ameyî rêzkerdene:

''-2022 de kesêk, panc menganê verênan ê 2023yî de zî tewr tay 6 kesan îşkenceyî ra dinyaya xo bedilnaye.

-Panc menganê verênan ê 2023yî de 270 kesî raştê îşkence û mualemeya xirabe ameyê, coka înan muracatê TÎHVî kerd.

-Goreyê TÎHVî 2022 de hûmara serebûtê îşkenceyanê zîndanan 1201 a

-Goreyê ÎHDyî 2022 de nezaretan de tewr tay hezar û 347 kesî raştê îşkence û muameleya xirabe ameyî. 

-2022 de çalakî û nawnayîşan de 144ê ci domanî tewr tay 5 hezar û 434 kesî û panc menganê verênan ê 2023yî de zî 49ê ci domanî tewr tay hezar û 557 kesî raştê îşkence û muameleya xirabe ameyî. Netîceya nê mudaxeleyan de tewr tay 50 kesî birîndar bîyî.

-2022 de tewr tay 230 kesî, panc menganê verênan ê 2023yî de tewr tay 76 kesî raştê îşkence û muameleya xirabe ameyî. 33 kesî zî wextê sereştişan de raştê îşkence û muameleya xirabe ameyî

-Goreyê ÎHDyî 2022 de 198 kesî raştê ferzkerdişê ajanîye, remnayîş û gefan ameyî.

-Goreyê TÎHVî 2022 de zîndanan de 65 tepişteyî, panc menganê verênan ê 2023yî de zî 10 tepişteyî merdî. Goreyê ÎHDyî 83 tepişteyî 2022 de zîndanan de bi hawayêkê şikdarî merdî.''