Grevê vêşanîye yê vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan roja 269. de zîndanan de dewam keno. Grevê vêşanîye 27ê teşrîna peyêne ya 2020î de dîyabi destpêkerdene û 14ê temmuze ra nata 15 rojan de yew koma grevî vurîyena.

Çalakîye pê koma 49. kewte roja 269. Grevê Kampa Multecîyan a Mexmûrî roja 248. de, grevê vêşanîye yê Kampa Lavrioyî ya Yunanîstanî zî roja 231. de dewam kenê.

Hemsereka Komîsyonê Zîndanan ê Îstanbulî yê Komeleya Huqûqnasan a Seba Azadîye (OHD) Destîna Yildiz derheqê babete de ANFyî rê qisey kerd û kerdişê îdareyanê zîndanan rexne kerdî. Destîna Yildiz vat: ''Qedîyayîşê dora çalakîye ra dima herinda werdê dîyetî de werdo normal dîyeno tepişteyan ke no zerar dano weşîya înan. La na babete xemê îdareyan de nîya. Verî semedo ke 5 rojan de yew bi tepişteyan kontrolo pîl ê weşîye nêkerdêne. La semedo ke wext zêdîya ganî na babete de tepişteyî baldar bibê.

Îdareyê zîndanî hem rewşa tepişteyan reyde eleqeder nêbenê hem zî her roje cezayanê dîsîplînî zêdînenê. Ganî îdareyê zîndanan nê hukmat bi baldarî nêzdîyê na mesele bibo. Hem ma xîret kenê ke vengê muwekîlanê xo biresnê teberî hem zî tepişteyî pê çalakîyanê xo xîret kenê ke vengê xo biresnê rayaumûmîye. Hukmat herinda ke na babete de gamêke bierzo vera cezaya dîsîplînî zêdîneno, erkanê îdareyan zêdîneno.''