Komeleya Huqûqnasan a Seba Azadîye (OHD), Baroyê Amedî, Komeleya Heqanê Merdiman (ÎHD) û Komeleya Paştdayîşê Merdimanê Tepişteyan  (TUAY-DER ) derheqê binpaykerdişê heqan ê zîndananê kampusî yê Amedî de baro de eşkerayîye daye.

Hemsereka Şubeyê Amedî yê OHDyî Gîzeme Mîran ard ziwan ke zîndanê welatî de binpaykerdişê heqanê tewr girdî ciwîyenî. Raypor de tesbîtê zîndanê ke kampus de ca genê wina ameyî rêzkerdene:

Tepişteyan xapînenê vanê avûkatê şima ameyî û înan pêvînayîşê îstîxbaratî rê mecbur verdenê. Koguşî cigêrayîş de yenê serûbinkerdene û hûmartiş de muameleyo xirab yeno kerdene. Warê aktîvîteyanê komelkîyan bi keyfî yenê qirewtene û îmkanê sey qiseykerdiş û sporî yenê wedartene. Koguşî bi kamerayan yenê seyrkerdene. Cigêrayîşo rût yeno ferzkerdene û kam ke vera nê bivejîyo yeno derbkerdene û raştê cezaya dîsîplînî yeno. Doktorî kêm ê û sewqê nêweşxaneyan zaf erey benê û wextê sewqî de di kelemçeyî dîyenê destê tepişteyan ro û muayene pa kelemçeyan  yeno kerdene. Rojnameyê sey Yeni Yaşam û Everenselî nînê dayene. Wird tay o û hîjyenîk nîno hazirkerdene. Kantîn de her çî zaf vay o. Rîyê nuştişê deyîranê kurdkî ra cezaya hucreyî yena dayene. Kitabê kurdkî nînê dayene.

Sereka Komîsyonê Çîmdarî yê Zîndanî yê  Merkezê Heqanê Merdiman a Baroyê Amedî Adîle Salman bale ante rewşa tepitşeyanê nêweşan ser û vat, “Tepişteyê nêweşî nêeşkenê miqatê xo bê. Coka gerek cade serbest bêrê veradayene, înfazê înan peyde bêro eştene. Reyna cigêrayîşê teberê merdimîye gerek bêrê vindarnayene. Gerek nêweşî cade nêweşxaneyan rê bêrê sewqkerdene."