Koordînasyonê Çimdarîye û Teqîbê Grevanê Vêşanîye pare kerd ke zîndananê Serhed û Dengizê Reşî de heqê weşîye yê tepişteyan yenê astengkerdene, tedayî zêdîyenê. Koordînasyonî waşt ke wa tecrîd cade wedarîyo.
Koordînasyonê Çimdarîye û Teqîbê Grevanê Vêşanîye raporê xo yê serê zîndananê herêmanê Serhed û Dengizê Reşî Wan de bi eşkerayîya çapemenîye pare kerd
Endama Koordînasyonû OHDyî avûkate Ebruye Demîrtepe eşkerayîye wende.
Demîrtepe da zanayene ke tepişteyê grevê vêşanîye kontrolê weşîye nênê kerdene, nênê bverdene bi revîrî, awe û şeker nêdîyenê înan. Demîrtepe îfade kerd ke kerdişanê îdareyê zîndanan ra grev seke vurîyayo rojeyê mergî.
Demîrtepe vist vîrî ke seba tepişteyanê grevî vîtamînê B1î zaf girîng o la no vîtamîn zî nêdîyeno. Demîrtepe pê hesna ke tepişteyê ke kewenê grevê vêşanîye raştê tehqîqatê dîsîplînî yenê.
Demîrtepe venga îdareyanê zîndanan da ke cade peynîya nê kerdişanê xo bîyarê û seba tepişteyan heyetanê weşîye bişawê, îhtîyacanê înan peyda bikrê û tehqîqatan anêkerê.
Demîrtepe venga Wezîrîya Edaletî û Meclîsî zî da ke wa cade waştişanê tepişteyanê grevî bîyarê ca, peynîya tecrîdê Îmraliyî û pêro zîndanan bîyarê.
Demîrtepe vat: ''Seba ke meseleya kurdan bi rayîrê demokratîkî çareser biba ganî tecrîdê vera Abdullah Ocalanî bêro wedaritene. Ma venga pêro rêxistin û dezgehanê heqanê merdiman û huqûqî danê ke seba ke waştişê tepişteyan qebul bibê têbigêrê.''
