Hemseroka KCD û Parlamentera HDP ya Colemêrge Leyla Guvene di roca 60’ine de ya. Leyla Guvene didi aşmî yo, bi bedenê xo verva tecrîdê ro ser Rayverê Şarê Kurdî Abdûllah Ocalanî, tekoşînêke daya dest pêkerdene. Çalakîya Rêzdar Guvene, Çalakîyêka sîyasî ya û verva konseptêkê sîyasî û di serdemêkê zafêrî muhîmî de, ameya destpêkerdene. Di tarîxê Tekoşîna Azadî ya Şarê Kurdî de,çalakîyê wina sîyasî ke mohrê xo ro demî dayo û bîyê destpêkerdişê serdemê neweyan, zaf ê.

Zîndanê Amede, cayêko binîşane yê nêy çalakîyan o. Di Zîndanê Amede de verva Faşîzmê 12 Îlone, ke zê ewroyî, seba Şarê Kurdî konseptêko sîyasî yo taybet amebi destpêkerdene de, xeylê çalakîyê sîyasî, ke bîy “abîdeyê îradeyê însanî”, amey rodar vistene. Çalakîya Mazlûm Doganî, ” Çalakîya Çaran” û “Roceyê Mergî” nîna ra beşêke yê. Di çalakîya Roceyê Mergî yê Zîndanê Amede ya serra 1982’ine de kadroyanê PKK’yî ra Kemal Pîr,M.Hayrî Dûrmûş, Akîf Yilmaz û Alî Çîçekî Cuwîyeyê xo vînî kerd. Nêy çalakîy bîy binkeya şerrê çekdarî yê Hereketê Azadîya Şarê Kurî. Bi vatişêko bîn, di binkeya rewşa ewroyine ya Şarê Kurî ke di Rochelato Mîyanên de bîyo aktorêko sereke de, nêy çalakîy est ê.

Di xoverdêrîya Cînîyêy Kurdan de zî reyna bi heman awayî, Zîndanê Amede cayêko taybet o. Destpêka bi xoverdêrîya Sara/Sakîne Cansiz û rayhevalanê aye, dime ra çalakîya Zîlan, Bêrîtan û Semayan. Rayira înan de çalakîya Arîn Mîrkan û heta resena Delal Amed û Medîya Mawayan, na binkeye sero yê.

Faşîzmê Dewleta Tirke dorêka bîne di şexsê Erdoganî de, verva Şarê Kurdî konseptê çinêkerdişî dayo destpêkerdene. No faşîzm baş zaneno ke, se serra 21’ine de bi qasoke tarîx de nîyameyo vînayişî, Şaro Kurd nizdê azadîye yo. Heke na dore zî bişikê na tekoşîne têk berê, do se serrêka bîne zî bi kurdan bidê vîndîkerdişî û pergala xo ya faşîste ke înkar û îmhaya şaran sero ameya awankerdişî, bidomnê. Bi no sebeb,bi tecrîdê mûtlaqî yê verva Rayver Ocalanî konseptêkê Îmha, ke şertanê Zîndanê Amede êy faşîzmê Evrenî zî derbas keno, vist merîyete.

Bi no feraset, Vakûrê Kurdistanî û hemeyê Tirkîya ro Şarê Kurdî, kerd Îmralî. Bi şerrê topyekûnî,bajarê kurdan wêran kerdîy. Bi pergala yewmerdimî ke projeyêkê dewleta bixo yo, hemserok,parlamenter û şaredarîy zî mîyan de bi deshezaran kurdîy,devistîy zîndanan. Êrîşê îşgalkerî êy verva Vaşûr û Rojavayê Kurdistanî day destpêkerdene.Seba têkberdişê destkewteyanê Şarê Kurdî êy Rochelatê Mîyanênî, bi heme çeteyê cîhadîst û hovan reyde, şirîkatî kerde. Heme erj û îmkanê xo di qada mîyannetewî de kerdî mijara bazarî û bi destûrê nêy hêzan, Efrîn îşgal kerd. Pêvajoya verva Rêzdar Leyla Guvene zî bi eşkerayî û şermezarkerdişê na hovîtîya verva Efrînî dest pê kerd.

Şaro Kurd ewro di Rochelato Mîyanên de bi qasoke di tarîx de nîyameyo vînayişî, wayir destkewte û fersendan o. Heman wextî de bi qasê pîlîya nêy fersendan, bi talûkeyê girdan reyde zî ribiri yo. Pergala tecrîdî, heme zext û zordarî û êrîşêy dewleta tirke bi ney sebebî yê. Di na rewşa kaotîke de Leyla Guvene bi çalakîya xo bî çirûskêka newîye ya xoverdêrî.

Ewro reyna, di wexto ke verva Şarê Kurdî konseptêkê îmha û qirkerdişî di hemeyê Kurdistanî de yeno rayirberdişî de, bi verkêşîya cînîyêka kurde Leyla Guvene, Zîdanê Amede de tarîx xo digarg keno. Leyla Guvene, zê Kemal û Xeyrîyan di salona mehkemaya Amede de, mexsedê çalakîya xo arde ziwan û vat; “Ez cînîyêka kurde ya rêze ra bîya. Bi paradîgmaya Rayver Ocalanî min xo nas kerd û bîya sîyasetmedarêka cînî û verkêşa Şarê Kurdî. Bi no sebeb ez tecrîdê verva Rayver Ocalanî qebûl nêkena û seba ke no tecrîd bêro wedartiş, ez dest bi çalakîya grevê veyşanîye kena” sîlayêka pîle ro riyê faşîzmê AKP û MHP da.

Bi no sebeb çalakîya Rêzdar Guvene çalakîyêka rêze ra nîya. Bi goreyê wext, fersend û talûkeyan, çalakîyêka tarîxî ya. Peynî se bena wa bibo, do na çalakîye bibo destêpêka newîye. Gere Şaro Kurd, dostîy,heme dormeyê dimeokratîkî û kesêy wayir wijdanîy na çalakîya Rêzdar Guvene, baş fehm bikerê û ro na çalakîye wayir bivecîyê. Gere heme cînîy, ciwanîy û Şaro Kurd, di çar perçeyanê Kurdistanî, Ewropa û dinya de bi çalakîyanê xo, na gama tarîxî de ca bigero û verpersîyarîya xo bi ca bîyaro.

Çime: Yenî Ozgur Polîtîka