Afrîkaya Mîyanêne de zêdeyê nîmeyê nufûse muhtacê xida yo

Programê Xida yê Dinya (WFP) yo ke pabesteyê Neteweyê Yewbîyayeyî yo, pêhesna ke Komara Afrîkaya Mîyanêne de tewr tay se ra 40’ê nufûsa ci vêşan o û nîme ra zêdeyêrê nufûse zî muhtacê xida yo.

Goreyê raporo ke hetê Programê Xida yê Dinya (WFP) ke pabesteyê Neteweyê Yewbîyayeyî (NY) yo, serra 2013’î ra heta menga Sibat a emserî Komara Afrîkaya Mîyanêne de, ke şero xomîyanên hewna dewam keno, bi mîlyonan kesî vêşan ê.

 Bi Pêroyî Hîrê ra Diyê Înan Muhtacê Hetkarîye yê

Goreyê raporê WFP’yî dimayê kewtişê serekê dewlete Françoîs Bozîze yê serra 2013’î, Komara Afrîkaya Mîyanêne rîyê şerê xomîyanênî ra problemêko pîl ê vêşanîye esto. 4.5 nufûsa ci ra tewr tay 1.8 mîlyon vêşan ê. Rapor de ame vatene ke hûmara kesanê ke muhtacê hetkarîya erzaqî yê tewr tay 2.9 mîlyon a û nîmeyê na hûmare zî doman ê.

Rapor de problem asayîşî yê welatî ame bivîrardene, ke pîya bi îmzakerdişê peymana aşitîye ya menga Sibate zî problemê asayîşî dewam kenê. Vervatoxê WFP’yî Hervé Verhooselî ke rapor eşkera kerd, seba bicaardişê şertanê peymane veng da 14 grûbanê çekdaran, ke peymane îmza kerdebî û hukmatî zî tesdîq kerdebî.

Rixmê Pêkerdişî de Şerê Mabênê Grûban Dewam Keno

Verê şerê xomîyanênî ke nufûsa Komara Afrîkaya Mîyanêne nizdê 5.1 mîlyonî bîye, dima ra 2013 de tewr tay 600 hezar kesan xo seperna welatanê cîranan. Peymana aşitîye ya ke menga Sibate de amîbî îmzakerdene zî problemê asayîşî hal nêkerd. Destpêkê şerê xomîyanênî ra heta nika 8 reyan peymana aşitîye amî îmzakerdene.