Almanya: Ma zereyê planê DYA de ca nêgênê

Almanya waştişê cagirewtişê zereyê planê Amerîka yê seba daxilkerdişê leşkeranê xo yê tengasîya Tengawa Hurmuzî bi hawayêk red kerd. Wezîrê Karanê Teberî Maasî vat ke do tewrê planê DYA nêbê û vat, “Vînayîşê ma û yê Washingtonî yewbînan ra cîya yo.”

Dimayo ke hêzanê asayîşî yê Îranî Tengawa Hurmuzî de dest da serê tankerêka petrol ya Îngilîzan krîzêk vejîya û welatê rojawanijî kenê ke çareserîyêk peyda bikerê. Xusûsen zî seba asayîşê rayîrê tîcaretî yê Tengawa Hurmuzî wazenê ke hêzanê leşkerîyan bihewilnê bi herême. Seba naye zî îdareyê Washingtonî demêk o Berlînî ser o zextan keno ke paştdayîşê leşkerîyî bide nê planê înan.

Hukmato federal o ke Angela Merkele serekwezîrîya ê kena, cewabêko negatîf nê waştişê DYA rê da. Cewab paytextê Polonya Varşova de bi wesîleya serrgêra 75’ine ya xoverdayîşê Varşova yê hemverê rejîmê Nazîyî de hetê wezîrê Karanê Teberî Heiko Maasî ra ame eşkerakerdene.

Maasî vat ke Almanya do mîyanê mîsyono ke serkêşîya ê DYA kena ca nêgêro û vat na babete de têkilîyêka înan a xurte bi hemmeslekanê înan ê Fransayijan dir esta. Wezîrê Karanê Teberî yo Alman o ke sosyal demokratan ra yo vat ke ê metodanê DYA yê seba zêdekerdişê zextî şaş vînenê. Maasî vat, “seba çareserîye herinda tengezarîya leşkerîye de ganî dîplomasî bikewo dewre.”

 DYA, pîya bi Almanya wazena Japonya, Fransa, Koreya Başûrî û Awustralya zî tewrê nê planî bibê. Welatanê bînan hewna eşkerayîyêka fermîye nêdaya. Yeno texmînkerdene ke Îngilîstano ke keştîya ê amîya destsernayene plane ‘mîsyonê Ewropa’ bifîno dewre. Halê nikayênî de Fransa, Îtalya, Îspanya û Danîmarka paştî danê ‘mîsyonê Ewropa’ yo ke hetê Îngilîstanî ra ameyo pêşnîyarkerdene.