Pûtînî rojnameyê Corriere della Sera yê Îtalya rê qisey kerd û vat, “Goreyê mi babeta bêsîlehbîyayîşî de girewtişê tedbîranê eşkerayan do huzûrê mîyanneteweyîyî hîna bikero xurt.”

Pûtînî vat Rûsya wayîrê îradeyê sîyasîyî ya ke bieşko nê bikero û vat nika dora qerardayîşî yê DYA ya.

 Serokdewletê Rûsya Pûtînî ard ziwan ke hewteyê ravêrteyî de, wextê kombîyayîşê berzî yê G20’î yê Osaka de ê Trumpî rê qalê babete kerdo û vat, “Wina aseno ke Washington verê wextêkê kilmekî çarçewaya programêkê stratejîkî yê hîrayî de xurtkerdişê dîyalogê Rûsya dir fikirîyayo.” 

 Pûtînî verê nê eşkerayîya xo roja Çarşemeyî qanûno ke peymana hêzê nukleerî yê bi menzîlê mîyanênî INF’yî betal keno, tesdîq kerdibi.