Goreyê zanayîşanê ke yewîyanê asayîş û xelisnayîşî yê qeraxê Îspanyayijan ra ameyê girewtene, keştîya ke nêzdîyê 50 koçberî tede bîyî û Fas ra verê xo dayo Îspanya, Deryayê Sipîyî de vîndî bîyî.

Ame zanayene, keştîyêka kiriştişî ya ke ver bi lîmanê Motrîlî yê Îspanya şina, heşarê keştîya koçberan bîye û 27 koçberê ke tede yê xelisnayî. Labelê selahîyetdarê Îspanya vanê tewr kêmî 49 koçberî keştîye de bîyî û 20 ra heta 22 yê înan vîndîbîyayî yê.

Goreyê doneyanê Rêxistina Koçî ya Mîyanneteweyî ya Neteweyê Yewbîyayeyî, 1’ê Çeleyî ra nata tewr kêmî 569 koçberî Deryayê Sipîyî de vîndî bîyî. Kesê ke bîyê vîndî û cuya xo vîndî kerda ra 173 kesî rayîrê Îspanya de cuya xo vîndî kerda.