Yeno vatene bi zêdebîyayîşê germbîyayîşê globalî, cemedê Hîmalayan her ke şino helêno û eke wina dewam bikero do tesîrêko rasterast cuya mîlyonan kesanê ke Asya de ciwîyenê ser o bikero.
Xebata ke bi serkêşîya Joshua Maurer de, ke wekenitoxê Unîversîteya Colombîya ya New Yorkî ray o, ameye kerdene herêmanê Çîn, Nepal, Hîndistan û Bûtanî de Koyê Hîmalaya ame şopnayene. Xebate bingeyê fotografanê satalîte yê îstîxbaratê Amerîka yê nê 50 serranê peyênan de amî kerdene û kovara Science Advances (Averşîyayîşê Îlimî) de ameye weşanayene.
Goreyê wekenitişî çaryewê cemedê Hîmalayan nê 50 serranê peyênî de helîyayo. Ser de zî nê serranê peyênan de cemed hîna rew helêno. Goreyê wekenitişî 2000 ra nata cemedê Hîmalaya her serre qasê 43 santîmî helênê, des serranê verê ê de no qasê 20 santîmî bi.
Goreyê xebate, ke ewnîyayê 650 fotografanê satalîte yê Hîmalaya ra, cemedo ke hewna nêhelîyayo qasê 600 mîlyar tonî yo. Goreyê daneyanê xebatanê bînan no tena texmînêk o.
Cigêrayîşî de ame vatene ke halê nikayênî de 800 mîlyon merdimî, awa koyanê Hîmalaya seba zîret û şimitişî şuxulnenê. Cigêrayîşî de ame vatene, “Eke cemed wina bihelîyo, do herême de wextêk ra dima ziwabîyayîş virazîyo.”
