Lîbya de hêrişê hewayî de 40 macîrî ameyî kiştene

Nêzdîyê paytextê Lîbya Trablûs de merkezê macîran rê hêrişê hewayî ame kerdene. Netîceya hêrişî de 40 macîrî ameyî kiştene û 80 zî birîndar bîyî.

Merkezê macîran ê paytextê Lîbya Trablûs de rîyê hêrişê hewayî ra 40 macîran vefat kerd û 80 zî birîndar bîyî.

Herîşê hewayî hema hetê kesêk ra nêameyo xoser girewtene la  general Halîfe Haftaro ke wazeno Trablûsî bigero binê destê xo o sey berpirsîyarî yeno vînayene.

Buroya Komîserîya Berze ya Macîran a Neteweyê Yewbîyayeyî yê Lîbya  hesabê xo yê Twîtterî ra ard ziwan ke ê rîyê nê hêrîşî ra zaf qesewat kenê û vat: ‘’Sivîlî ganî çirey hedef nêbê’’.

Macîrê ke Lîbya de yê maxdûrê pêkerdişê hukmatê Lîbya û welatanê Ewropa yê. Macîrê ke derya de yenê tepiştene peyser şawîyenê Lîbya.  Goreyê pêkerdişî Lîbya macîran erdê xo de tepişnena. Rêxistinanê Efû nê pêkerdişan sey teberê merdimiye vînenê  û vera ci reaksîyon danê. Macîrî sey koleyan yenê rotene zî. Derheqê naye de dîmenî vejîyayîbî meydan.

2011 de Mûammer Kaddafî bi mudaxaleyê NATO amebi wardayene. Dimayê wardayîşê Muammer Kaddafîyî Lîbya ke kaos de ya de cîya di hukmatî estê. Reyna zaf mîlîs û grûbî zî herêmanê xo de qanûnanê xo bica anê.