Kombîyayîşê Meclîsê Makebajarî yê Parîsî de seba xurtkerdişê hesasîyetê ciwanan ê serê babetanê îklîmî û dormeyî derheqê awankerdişê „Akademîya Îklîmî“ de qerar dîya. Heman kombîyayîşî de pîya bi akademîye ame pêhesnayene ke seba Parîsî „qey îklîmî halo nêalelade“ ameyo îlankerdene.

Bi qeraro ke nameyê ci ravêreno amac o yo ke amacê Peymana Îklîmî ya Neteweyê Yewbîyayeyî ke Kanûn a 2015’î de kombîyayîşê COP21’î de ameybî qebûlkerdene, bêrê bicaardene.

Seypêyê Panelê Vurayîşê Îklîmî Yeno Awankerdene

Bi qerarê Meclîsê Makebajarî yê Parîsî do heyetêk bi nameyê „Gîec Parîsî“ bêro awankerdene, ke „Gîec“ bi Franskî kilmkerdişê Panelê Vurayîşê Îklîmî yo. No heyet do ekspertanê îklîmî, bajarwanî û heman wextî de sosyologan ra bêro pê û seba bicaardişê polîtîkayanê îklîmî do înan dir mişawere bêro kerdene.

Xeylî Bajaran zî Qerarê Seypêyî Girewtîbî

Verê Parîsî Parlementoyê Brîtanya zî hukm dabi ke problemê îklîmî hendî resayo halêkê bitehlukeyî. Meclîsanê bajaran ê Londra, Basel, Oakland, Los Angeles û Vancoverî zî seba îklîmî halo lezgîn îlan kerdibi. Tewr peynî bajarê Konstanzî yê Almanya qerarêko winayên dabi.