Goreyê raporê sazgehê bi nameyê Overseas Development Instîtute (ODI), sermayegozarîya ke seba komirî yena kerdene vernîya germê globalî a kena û na nê serranê peyênan de hîrê qatî bîye zêde. 

Rapor vernîya kombîyayîşê berz ê G20'î yê Japonya ame weşanayene. Rapor de ame vatene, endamê G20'î subvansîyonê ke seba vetiş û bikarardişê komirî pêşkêş kerdê serra 2017 de restî 47 mîlyarî dolarî. Serra 2013 de no mîqdar nêzdîyê 17 mîlyarî dolarî bîyî û no hîrê qatî bî bi zêde.

Rapor de ame vîrardene ke, endamanê G20'î serra 2009 de qerar dabî ke sermayegozarîya komirî û petrolî kêm bikerê. Rapor de ame vatene, qazo sereke yo ke rayîrê germê globalî akeno karbondîoksît o û no gaz zî se ra 80 komirî ra vejîyeno.