Serekê DYA Donald Trumpî peyamê xo de vat, “Îran wa hayîya şima gefanê şima ra estbo. Beno ke bi hawayêk ke şima qe nêdîbi şima ser o agêrê.”

 Rixmo ke her di welatan vat ê nêwazenê şer bikerê, alozîya ke bena vêşî efkaran zî kena vêşî.

 Serekkomarê Îranî Hasan Rûhanîyî heta 7’ê Temmuze wext da welatanê ke morê xo dabi binê peymana nukleerî ya serra 2015’î ro û waştibi ke sozê xo bica bîyarê.

 Hasan Rûhanîyî vat ke eke welatê Ewropayijî yê ke morê xo dayo binê peymana nukleerî ro sozê xo bica bîyarê, do Îran zî goreyê peymane tê bigêro.

 Serekkomarê Îranî ard ziwan ke heta 7’ê Temmuze eke sozê ke dayê nêrê bicaardene do newe ra dest bi xebata reaktorê Arakî bikerê û nisbetê ûranyûmê zengînkerdeyî qasê se ra 3,67 bikerê vêşî.

Dimayo ke serekê DYA Donald Trumpî serra 2018 de bi hawayêkê yewhetî xo peymana nukleerî ra ant, hale peymane kewt tehluke. Îdareyê Îranî zî qerarê Trumpî ra serrêk dima pêhesna ke înan tayê sozê xo vindarnayê.

 Tehranî tewr peynî no hewte eşkera kerd ke înan nisbetê ûranyûmê zengînkerdeyî kerdo vêşî.