Hemsereke KCD‘yî û parlamentera HDP’yî Leyla Guvene 99 rojî yo, seba ke tecrîdê serê Rayberê Şarê Kurdî Abdullah Ocalanî bêro wedaritene grevê vêşanîye de ya. Almanya de seba ke paştdarîye bidîyo çalakîya Leyla Guvene û çalakwananê bînan paştdariyêka muhîme ame dayene. Almanya de 20 parlamenterê cinîyî yê meclîsê 8 eyaletanê cîya-cîyayan ameyî têhet û bi yew deklarasyono hempar paştdarîye daye Leyla Guvene.

Leyla Guvene 7’ê Teşrîna Peyêna 2018‘î de dest bi grevê vêşanîye kerd û rewşa ci ya weşîye reşta asta krîtîke.

GANÎ TIRKÎYA GOREYÊ PEYMANA HEQANÊ MERDIMAN A EWROPA TÊ BIGÊRO

Deklarasyon de, bale ancîye ser ke xêrca Guvene xeylî sîyasetmedarê HDP’yî û aktîvîstan zî bi heman taleban dest bi grevê vêşanîye kerdo û wina ame vatene: “Ma parlamenterê cinîyî, na rewşe ver bêveng nêmanenîme. Senî ke Guvene zî vana, ma zî vanê ke ganî Tirkîya goreyê peymana heqanê merdiman a Ewropa tê bigêro û tecrîdê serê Ocalanî bido wedaritene.“

Parlamenteranê cinîyan waşt ke wa problemê Kurdan ê Tirkîya bi hewayê  haştîye bêrê çareserkerdene û şaredar, parlamenter û sîyasetmedarê HDP’yî yê ke hepisxaneyan de yenê girewtene  cade bêrê veradayene. Deklarasyon bi serkeşîya parlamentera Parlamentoyê Keskan a Eyaletê NRW‘yî Aymaz û endama Meclîsê Eyaletê Hamburgî Cansû Ozdemîre ame amadekerdene. Parlamenterê cînîyê ke îmzaya eşta binê deklarasyonî wina yê:

Anke Schwarzenberge (Brandenburg Partîya Çepe), Berîvan Aymaze (NRW Partîya Keskan), Cansu Ozdemîre (Hemsereka Koma Partiya Çepe), Christiane Schneidere (Hamburg Partîya Çepe), Claudia Kohlere (Bavyera Partîya Keskan), Cornelia Luddemanne (Sachsen-Anhalt Sereka Koma Partîya Keskan), Dr. Carola Ensslene (Hamburg Partîya Çepe), Eva Lettenbauere (Bavyera Alîkara Sereka Koma Partîya Keskan) Eva von Angerne (Sachsen-Anhalt Alîkara Sereka Koma Partîya Çepe), Gulseren Demirele (Bavyera Alîkara Sereka Koma Partîya Keskan), Heike Sudmanne (Hamburg Îdarekara Koma Partîya Çepe), Juliane Nagel (Sachsen Partîya Çep), Karola Stange (Thüringen Partîya Çepe), Kati Engele (Thuringen Partiya Çepe), Katina Schuberte (Berlin Partîya Çepe), Kerstin Koditze (Sachsen Partîya Çep), Miriam Strunge (Bremen Partîya Çep), Sabine Boeddinghaus (Hamburg Hemsereka Koma Partîya Çepe), Sanne Kurze (Bavyera Partîya Keskan), Sofia Leonidakise (Bremen Partiya Çepe).