Riyîm Nefe Hûbeyt cinîyêka ereb a ke Tebqa de destê xo seba cinîyanê êzidîyan kerd derg ke hetê DAÎŞî ra ameyî remnayene û Nefe xîret kerd ke înan bixelisna.  Riyîma ke barbarîya DAÎŞî dîye serrêke de 8 cinîyê êzidîyî koletîye ra xelisnayî. Riyîme pare kena ke rixmo ke a tersaya pê cesareto ke YPJyî ra girewt no kerd. Riyîm dima ke Tebqa ame xelisnayene Meclîsê Cinîyan ê Tebqa de cayê xo girewt û nika zî tewra karê Heyetê Cinîyan ê Îdareyê Xoserî bena.

Riyîm Nefe Hûbeyt 29 serre ya û aslê xo de Serêkanîyê ra. Domanîya xo de keyeyê xo reyde koçê Tebqa kena. Riyîme serra 2011î de wextê destpêkerdişê şerê Sûrîye de Tebqa de bîye. Mabêna serranê 2013-2014î de Riyîme xo keyeyê xo ra nimitke Zanîngehê Hesekê de seba beşê mamostatîye qeyd kena. Wextêk de ke hem Ahrar Şam û Cephet El Nûsra û hem zî DAÎŞ şaristan de serdest bîye, seba ke tewra îmtîhanan biba nimitkî şîya Hesekê. Sinifa 3. de semedo ke şîyayîş û ameyîş zehmet bi Riyîme nêeşkîya wendişê xo dewam bikera.

Riyîme wexto ke cinîyê êzidîyî şinasnayî û zaf kewta înan ver. Riyîme serra 2016î de cinîya êzidîye ya bi nameyê Zorma şinasnaye. Zorma wayîra domanêka 8 serre bîya û destê DAÎŞî ra remabî. Riyîme vana: 

''Mi Zorma ra vat bê keyeyê ma la ez DAÎŞî ra zaf tersayêne. Ez seba ke cinîye binimna mi YPJyî reyde têkilîye naye ro û înan cesaret da mi. DAÎŞî fotografê cinîyan û domananê ke Tebqa de bîyêne vîn dêsan de daliqnayêne. Uca de fotografê Zorma reyde nûmaraya merdimanê ci yê Iraqî zî estbî. Ez gêrîyaya a nûmara la nêvejîya. Dima ez gêrîya merdimanê xo yê ke Iraq de yê û înan zî xo resna merdimanê Zorma. Dima embazanê YPJyîjan Kobanê ra telefon kerd û vat cinîyêka Rqayije do bêra û Zorma û kênaya aye bigêra. Rojêke ra dima cinîyêke ameya. 

Embazan hînî tim mi rê telefon kerdêne,  ez tersayêne la mi YPJyî ra cesaset girewtêne. Embazan tim mi rê vatêne 'Tayêk mend, tay xo ver bide. Ma do Reqa û Tebqa azad bikerê. Keyfê mi pê qiseykerdişê înan ameyêne. Bi nê hawayî mi serrêke de 7 cinîyê êzidîyî yê bînî xelisnayî. Embazan cayê cinîyan mi rê vatêne û ez zî nimitkî şîyêne uca û cinîyî înan ra girewtêne. Dima zî cinîya reqayîje ameyêne xo ê resnayêne embazan.

10ê gulana 2017î de Tebqa hetê hêzanê QSDyî ra ameye azadkerdene. Riyîme vana: ''Wexto ke QSDyî tîya azad kerde ma bîyî rehet. QSD û Îdareyo Xoser qîmet danê cinîyan û heqanê cinîyan pawenê. Cinîyî mîyanê sîyasetî, leşkerî de yê. Her ca de yê. Na zaf bala mi ante û ez pê perwerîya embazan rê girê dîyaya. DAÎŞ û OSOyî cinîyan rê xulm kerdêne, ê qetil kerdêne. La sayê QSD û Îdareyê Xoserî ma hêzê xo zafêr şinasnenê.''

Dima ke Reqa ameye xelisnayene Riyîme tewra karanê komelî bîye û Meclîsê Cinîyan ê Tebqa de û Heyetê Cinîyan ê Îdareyê Xoserî yê Rojawanî de zî ca gêna. Riyîme vat: ''Nika xeylêk cinîyê erebî Îdareyê Xoserî de estê û tewrê karî bîyî. Xeylêk cinîyê erebî zî tewrê YPJyî bîyî. Ma hînî seba ameyoxî zêdêr hêvîdar ê. Cinîyî rîya de wayîrê hêzêkê pîlî yê. Ma xîret kenê ke ameyoxê xo pê desstanê xo awan bikerê. Coka ma hêvîdar ê.''