Rêxistina Cinîyan ê Ciwanan ê Têkoşeran (RJCT) seba ke paştdayîş bida hunerê cinîyan ê ciwanan û nînan bida naskerdene vizêr Çemçemal de pêramotişê resiman akerd. Pêramotiş pê şîarê ''Pê çimanê cinîyan ê ciwanan û Kurdîstanî'' ame akerdene.

Pêramotiş de 36 resimî yenê mojnayene û pêramotiş do di rojan dewam bikero. Şarê herême û cinîyan ê ciwanan eleqeyêko pîl mojna pêramotişî. Walîyê Çemçemalî zî pêramotiş zîyaret kerd. Beşdaran ra Zeryane vat: ''Mi resimê xo de qala hewarê cinîyan kerde.''

Beşdara bîne Kazîwa zî vat: ''Mi resimê xo de qala kamuflekerdişê cinîyan kerde. Hêvî kena ke pêramotiş do dewam bikero.''

Beşdara bi nameyê Bêrîtane Zagros zî vat: ''Ma armanc kerd ke vengê cinîyan bireso pêro Kurdîstan. Pêramotiş de bi heman hewayî veng û rengê cinîyan estê. Tay resimî qala vengê cinîyan tay resimî zî qala raştîya cinîyan kenê. Resimêk zî qala dayîka kurde kena ke cenazaya lajê ci pê kargo erşawîyaye ci.''