Çarçewa programê KCD û DBPyî yê Çewlîgî de ewro  Hemsereka Pêroyî ya HDPyî Salîha Aydenîza ke cinîyan ê Çewlîgî de reyde ameye têhet.

Têhetameyîşo banê HDPyî yê bajarî de ame kerdene de pankarta ''Vera qirkerdişê cinîyan wextê pawitişê cinîya azade û komelî yo'' ameye daliqnayene.

Aydenîza ke tîya qisey bale ante xoverdayîşê  cinîyan ê kurdan ser û vat: ''DAÎŞî waştêne ke heme Rohelatê Mîyanênî pê destê xo îdare bikero la pê xoverdayîşê kurdan û xoverdayîşê cinîyan ê kurdan binkewt. Coka hema Dewaya Kobanê dewam kena. 7 hezîrane xo vîr a nêkenê. Wazenê HDPyî biqefilnê. Vera nayî tewr zaf cinîyî xo ver danê.  22 serrî ceza daye Leyla Guven. Çunke aye vera tecrîdî grevê vêşanîye dabi destpêkerdene. Grevê 200 rojan heme dinya ra vila bi. A cinî bî û bawerîya ci pê nê xoverdayîşî bibî. Pê perspektîfanê Birêz Abdullah Ocalanî verê cinîyan û komelî ame akerdene. Guvene paşta nayî ra dest pê çalakîye kerde. Vat ganî tecrîd bêro wedartene û Birêz Ocalanî bibo azad. Nika şexsê Guvene de cinîyan ra qesas genê. 

Eke îqtîdar biwazo mesajêk bido komelî verî cinîyan tepişeno û qetil keno.  Heme polîs û leşkerê ke şawenê Kurdîstan verî perwerdeyê taybetî ra ravênenê ke tîya çî wazenê bikerê. Rîyê tacîz û tecawuzî ra qet ceza nêdîyena înan.  Serê cinîyan ra wazenê komelî dîzayn bikerê. Vera nînan Birêz Abdullah Ocalanî zaf zelal çîyêk vat;  'Eke cinîye bibe azad komel beno azad.'  Eke meseleya kurdî bêro çareserkerdene Tirkîya bena demokratîk. Birêz Ocalan israr kerd vat  'yew hewte bidê mi ez na mesela çareser kena.'La înan tecrîd kerd giran. Pê demokrasî no sîstem eşkeno bêro bedilnayene. Ma do sîyasetê demokratîkî cameverdê û xoverdayîşê xo bidomnê.''

Badê têhetameyîşî programê KCD û DBPyî yê Çewlîgî qedîya.