Fermandara Qerargehê Merkezî yê YJA-Starî Zozane Çewlik hêrişê dewleta tirke yê vera Heftanînî û rojdem ercnayî. Qiseykerdiişê Zozane Çewlik ra beşêk wina yo:

''Çawişê pisporî yê dewleta tirke nê wextan de pê tecawuzî rojdem de yê. Tevawuzê Êlih, Silopî û Şirnex bîyî sebeb ke her kes wurzo payan ser. Ganî bêro zanayene ke êyê ke dest eşt erd û welatê ma do dest bierzê doman û cinîyanê ma zî. Hêrişê vera goristanan zî hîşmendîya nê tecawuzî ya. Ganî pirnikgirdê Kasimpaşayî rê cewab bêro dayene û o bêro vindartene. TC wazeno Kurdîstan, Lîbya, Îdlîb û Sûrîye îşxal bikero.

Astengîyê tewr pîlî yê ke verê hukmatê AKP-MHPyî de yê, gerîlayê YJA-Starî û HPG yê. Nika zî pê nameyê 'Pençe-Kaplan' hêriş kenê. Operasyon mengêke ra nata dewam keno. Seba ke hesabo ke Anqara de ame kerdene Heftanîn de nêbi generalê înan bêveng ê û her roje zûran kenê. Hêrişê ke Heftanîn de yenê kerdene seba îşxalê Başûrî yê. Ganî şarê ma û partîyê Başûrî pê naye bihesê û nêxepîyê. No erd bêwayîr nîyo.  PDK pê zanayîşan hetkarîya dewleta tirke keno.

Hetêk de îşxalî hetêk de zî xoverdayîş esto. Gerîlayî vera îşxalkeran bi hawayêkê bêhempayî têkoşîn kenê. TC seba ke leşkeranê xo bêro Xantûr şewêke de 5 reyî bombarduman kerd la nêeşka armancê xo bîyaro ca. Leşkerî gerîlayan ra hende tersenê ke teknîkî ra nêbo nêeşkenê gamêke zî bierzê.

Cengê Heftanînî de bi taybetî xoverdayîşê Şeşdara û Xantûrî bêhempa bîyî. Artêşa TCyî vera nê ruhî çin bena. Ruhê Apoyî îradeyêkê xurtî aferneno. No ruh qet teslîmîyet qebul nêkeno û tradîsyonê PKKyî ra yo.

Gerîlaya seserra 21. gerîlatîya Kuantumike ya. Gerîlayê kuantumî her ca de yê. Eşkera nêbeno ke key têgêrenê, se kenê. Kuantum de aqil û teknîk esas o. Gerîlayî hînî têna cayêk de nêmanenê xo resnenê her ca. Sendromê Nisêbînî ra dima nika zî artêşa tirke sendromê Heftanînî ciwîyena. 

Gerîlayan morê xo da Cengê Heftanînî. Gerîlayî hînî serwerîya xo ya teknîk û taktîkî mojnenê. Hêzanê ma yê YJA-Starî pratîkê xo yê emserînî de pê çalakîyanê xo yê xoseran cîyayîyêka girînge afernaye. Gerîla Zeryana ke gerîlaya di serran bîye, nêverda ke leşkerî aver şorê. Vera hêrişanê serê cinîyan, sey Hêzanê Pawitişê Kurdîstanî ma xo pawitişê cinîyan ra mesuldar vînenê û rêxistinîya xo xurtêr kenê.  Gerîlayê cinîyî do faşîzm çin bikerê. Roje roja ci ya ke ma wayîrê erjanê xo bivejîyê. Roje roja rijnayîşê faşîzmî ya. Roje roja serkewtişî ya.''