Endama Konseya Rayberdişî ya KJK‘yî Çîgdem Dogu, serrgêra 20’ine ya komploya mîyanneteweyîye ya ke vera Rayberê Şarê Kurdî Abdullah Ocalanî ameya kerdene de qisey kerd. Dogu wina va: “Rayber Apo, têgêrayîşê  ma û ê cinîyan, heta nika na komploye tena seba şexsê xo de nêdîya. Na komploye şexsê Rayberê ma de, pêro bindestan rê, cinîyan rê ameya kerdene. Ma bi qerardarîye kenê ke serrgêra 20’ine  de, na komploye mabên ra wedarîme û faşîzmî birijnîme. Şermezarkerdişê komploye bes nîyo,ganî faşîzm o ke şexsê AKP-MHP‘yî de dewam keno, bêro rijnayene.‘‘

ÇALAKÎYA FEDAÎYÎ YÊ BI HALÎT ORALÎ DEST PÊKERD

Dogu wina qisey kerd: “ 9‘ê Teşrîna Verêne de, wexto ke komploye dest pêkerd, Halît Oralî hepisxane de çalakîya fedaîyîye kerde. Bi na çalakîye bi seyan cinî, ciwanan dest bi çalakîyan kerd, her hetê dinyaye de adirê xoverdayîşî ameyî vêşnayene. Ruhê ey hevalan, ey merdimanê ma yê fedaîyan hîna zî ciwîyeno. Ewro zî şexsê embaza ma Leyla Guvene de, xoverdayîşê grevê vêşanîye esto.“ Hewlêr, Kanada, Galler û Strasboûrg de grevê vêşanîye yê bêdem û bêdore dewam kenê û no xoverdayîş her ke şono pêl bi pêl beno hîra. Nê çalakîyî rastîya ewroyî de wayîrê manaya pîle yê. Ma nê hevalanê xo selam kenî û vanê ke ma her tim înan het de yê.“

GREVÊ VÊŞANÎYE HÊZÊ XO XOVERDAYÎŞÊ ÎMRALÎYÎ RA GÊNÊ

Doguye qiseykerdişê xo de bale ante xoverdayîşê Ocalanî ser û wina va:“ Xoverdayîşê Ocalanî, tarîx de wina asan nêno dîyayene.  Rayber Apo damara xoverdayîşî û zerrîya serkewtişî yê seserra 21’ine yo. Rayber Apo Îmralî de 20 serre yo ke xoverdano. Leyla Guvene zî xeylî serrê xo mabênê sîyasetî de derbaz kerdê. Reyna teber û hepisxaneyan de grevê vêşanîye yê bînî zî estê. Ma tîya ra vînenê ke, vera qirkerdişê, çinkerdişê dişmenî de yew xoverdayîş esto. Rayberîye  vatbî projeya min a mucadeleyê cinîyan nême menda. 20 serra xo ya Îmralîyî de newe ra bingehê mucadeleyê cinîyan, gerîlla û mîlîtanan eşt ci.

Şansê ma esto ke ma Rayber şinasnayo û dîyo. Xeylî embaz û dostanê  ma no xeyal  kerdene. Rayberê ma do, dêsanê Îmralîyî birijno û bêro ma het, ez qasê nameyê xo bawer a. Rayberî cinîyan de mucadele kerdene û ci ra hes kerdêne. Hem hetê hîsîyat hem zî hetê bedenî ra waştêne ke cinîye xo newe ra bivirazo. Wexto ke ey de ameya têhet, heyecanê pîlî ez girewt a. Vengê mi nêvejîyene. Mi ra va ‘ Ti çira sey koleyan qisey kena, wa vengê to bivejîyo ‘. Ez verî taye mat menda la mi pey cû fehm kerd ke Rayber keno ke ez biba azad,biba wayîrê hêzî. O wext ez hîna zaf sivike bîya. Mi sîyasetê dinyaye ra fehm nêkerdene, mi, nêzanayêne  ke Tirkîya wazena ke se bikero. La Rayberî ma de sîyaset, polîtîka qisey kerdene.“

Dogu peynîya qiseykerdişê xo de bale ante felsefe û ferasetê Ocalanî ser û wina va:“ Yew  manaya neweye dayo mucadeleyê cinîyan û yew bero newe akerd. No tena seba Kurdan nê, seba pêroyê şaranê bindestan rê zaf muhîm o û manaya xo zaf zaf giran a. Wexto ke ma yewbînî ra visîyayêne, ma waşt ke Rayberî reyde fotograf biancîme. Ma ameyî têhet poz da la ma newe fehm kerd ke  makînayê fotografî çin o. Rayberîye va wa her kes nê fotografî bi zerrîya xo bianco. O wext vatbi, prosesêko zaf giran û derg do dest pêbikero û seba naye zî waşt ke ma wayîrê yewbînan bivejîyê. Ganî ma xêza Rayber Apoyî teqîb bikerê û komploye birijnê.“