Bexdad de bi şîarê ''Ma do bi îradeyê cinîya azade vera qirkerdişî têkoşîn bikerê'' konferasê cinîyan ame organîzekerdene. Konferanso ke bi hemkarîya TAJÊ Ame organîzekerdene serre ra zafêr cinîyî tewrê ci bîyî.

Roniştişê diyînî yê konferansî de Kuwêstane Ekrem Fereca ke destê DAÎŞî ra xelisîyabî, qisey kerd. Kuwêstane waşt ke wa Qirkerdişê Şingalî sey Qirkerdişê Helebçe nêro peygoşkerdene. Qiseykerdoxa bîne  Necate Babît Xelefa ke aye zî destê DAÎŞî ra xelisîyabî vist vîrî ke hema zî birayêkê ci û kênaya ci destê DAÎŞî de yê. Roniştişê hîrêyînî de Hemsereka KNKyî Zeynepe Murad qisey kerd û da zanayene ke cinîyan ê kurdan cuyêka newîye înşa kenê.

Konferans bi netîcename qedîya.

Netîcename wina yo:

''Hema zî birînê Qirkerdişê Şingalî yê 3ê Tebaxa 2014î teze yê. No vera cinîyan ê êzidîyan qirkerdişo verên nêbi. Ma vera hêrişanê mezhebperest, nîjadperest, seksîst û dînperestan bi paştdayîşî xo ver bidê ke wa komel reyna dejê winasênî meanco.

Fermanê 3ê Tebaxe de mesuldarîyê hukmatanê Iraq û Herêma Kurdîstanî zî est ê la derheqê înan de tehqîqat nêame kerdene. Reyna welatanê sey Tirkîya zî paştî daye DAÎŞ la derheqê înan de zî tehqîqat nêame akerdene. Na rewşe şerm a û verê qirkerdişanê neweyan akena.

Hema zî huqûqê mîyanneteweyî de qirkerdişê cinîyan sey sûcê şerî nêhesîbîyenê Ganî dezgehê mîyanneteweyî û bi taybetî Neteweyê Yewbîyayeyî qirkerdişê cinîyan ê êzidîyan sey sûcê şerî û sûcê vera merdimîye qebul bikerê.

Şarê Şingalî nika pê îmkananê xo kenê ke newe ra şaristan de dezgehanê xo awan bikerê. La narey zî Tirkîya hêrişê Şingalî kena. Ma hêrişanê Tirkîya şermezar kenê û wazenê ke wa nê hêrişî biqedê.

Cinîyê êzidîyî ganî Şingal de tewrê pêro prosesan bibê. Birêka ke tede îradeyê cinîyan çin o, do mende nêba.''