Peymana Îstanbulî peymana verêne ya mîyanneteweyî ya ke seba ke şîdetê zereyî û şîdetê vera cinîyan bigêra yena caardene. Tirkîya ê welatan ra ya ke hêverî Peymane îmza kerde. La menga temmuze ra nata rayberîya îqtîdarî de Peymana Îstanbulî ser o nîqaşî yenê kerdene. Goreyê doneyanê Jinnewsî menga temmuze ra nata 35 cinîyî ameyî qetilkerdene û 8 cinîyî zî bi hawayêkê şikdarî merdî.

Cinîyanê Amedî derheqê Peymana Îstanbulî de ANFyî reyde qisey kerd.

Dîlane Çîtfçî îfade kerd ke cinîyî her warê cuye de maruzê şîdetê camêrdan benê û vat: ''Kişîyayîşê cinîyan polîtîk o. Öa wazenê welat de ke hetê cinîyan de yo biciwîyê. Herinda ke Tirkîya xo peymane ra apey ancena ganî seba pawitişê cinî, heywan û domanan qanûnan veja û nê qanûnan bîyara ca. Ez sey yew cinîye qerqilîyena ke şan bivejîya teber. Wa kişîyayîşê cinîyan biqedo. Kesê ke vera Peymana Îstanbulî vejîyenê kiştoxê cinîyan ê û mesuldarê kişîyayîşê cinîyan ê.''

Berxwedane Demîr vat: ''Dewlete bi nîqaşê Peymana Îstanbulî meseleyanê bînan mîyan kena. Eke ma vera nê kerdişan bêveng bimanê hêrişê vera cinîyan do bizêdêr. Ganî cinîyî vengê xo berz bikerê.''

Berfîne Turan ard ziwan ke pêro cinîyî tesîrê kerdişanê îqtîdarî de manenê û vat: ''Îqtîdar xîret keno ke cinîyan ser o plananê xo yê cînsîyan bîyaro ca. Ganî ma sey cinîyan wayîrê destkewteyanê xo vejîyê û vengê xo berz bikerê. Ma cinî yê, ma do sereyê xo nêarê warî.''

Hasrete Irçî vat: ''Hukmatî bi xîretê wedaritişê Peymana Îstanbulî qetilkerdişê cinîyan tesdîq kerd. Ma ganî destanê xo bidê yewbînan û destûr nêdê ke ê armancê xo bîyarê ca.''