Hemvervatoxa HDKyî Îdîle Ugurlu  hêrişê AKP-MHPyî yê vera rêxistin û destkewteyanê cinîyan, nîqaşê Peymana Îstanbulî ANFyî rê ercnayî.

Îdîle Ugurlu da zanayene ke îqtîdar nêafterano ke Peymana Îstanbulî nika batal bikero la prosesê janî de madeya 6284. batal kerde. Îdîle Ugurlu ard ziwan ke AKP her ke şino zêdêr beno pederşahî û nêrî. 

Îdîle Ugurlu vat: ''Peymana Îstanbulî qanûno bingeyî yo mîyanneteweyî yê cinîyan o. Na peymane seba pêro cinîya çimeyêkê nefesî yo. Peymana Îstanbulî netîceya kedaya cinîyan a. Coka îqtîdar nêeşkeno ke cade aye batal bikero. Têkoşînê cinîyan verê îdolojîya tekperestîye ya AKPyî de sey asteng a. Eke peymane bêra caardene cinîyî û komelê LGBT+Î do nefes bigêrê. Îqtîdar wina fikirîyeno ke o eşkeno cinîyan ser o formêk bido komel. La ganî ê bizanê ke têkoşînê cinîyan wina rehet nêno pûçkerdene. Vera şîdetê camêrdan nêrazîbîyayîşê cinîyan pêro dinya de vila benê. Amerîkaya Latîne, Rojawan, Rojhelatê Mîyanênî û Ewropa de nê nêrazîbîyayîşî cayê xo gênê. Îqtîdar pê fikrê 'Eke ez formêk bida cinîyan eşkena formêk zî bida komel' hêrişê cinîyan keno. Tacîz, tecawuz û şîdetî pê destê dewlete meşrû benê. 

Bi taybetî dewlete hêrişê cinîyan ê kurdan keno ke têkoşînê cinîyan ê kurdan her roje xurtêr beno. Îqtîdar senî ke DAÎŞî hêrişê cinîyan  kerd Peymana Îstanbulî ser o nîqaşî keno û wazeno ke çimê rêxistinanê cinîyan bitersno. Kurdîstan de tecawuzê çawişan zî pê na hîşmendîye ganî bêrê ercnayene. Nê nîqaşê Peymana Îstanbulî û îstîsmarê domanan hêz danê camêrdan. No n3eno qebulkerdene.

AKP pê na polîtîkayan wazeno ke komel bibo tek û vera çîyêk îtîraz nêkero. Astengîya tewr pîle ya vera na polîtîka cinî yê. ''
Îdîle Ugurlu peynî de îfade kerd ke înan derheqê madeya 6284. de broşurî cinîyan rê cila kerdî û pare kerd ke ganî cinîyî pê heqanê xo bihesîyê û hîşmend bibê. Îdîle Ugurlu vat: ''Roje roja hîşkerdişî nîya, roje roja wayîrvejîyayîşê heqanê ma ya.''