Rojnamegere û Endama Merkezê Cigêrayîşanê Jineolojî Nagîhane Akarsel 4ê teşrîna verêne ya 2022yî de Silêmanî de amebî qetilkerdene. Înîsîyatîfê Edaletî yê Seba Nagîhane Akarsel bi wesîleya serrgêra qetilkerdişê Nagîhane Akarsel eşkerayîyêke daye.

Eşkerayîye de dîya zanayene ke 24ê kanûna 2023yî de kiştox Îsmaîl Rifat Pekero ke hemwelatîyê Tirkîya yo, bi îdamî ameyo mehkumkerdene. Eşkerayîye de wina ame vatene: ''Peker verê cû Tirkîya de tepişte bi. La rixmo ke 12 serran cezaya zîndanî werda o 2022 de vera dîya. Goreyê îtîrafanê ey zîndan de 'selahîyetdarêkê tirkî' seba kişîyayîşê Nagîhane Akarsel pere dayo ey û o vera dîyayo. Eşkera yo ke mabênê Peker û MÎTî de têkilîya est bîya.

Xeylê delîlî mojnenê ke Nagîhane Akarsel hetê organîzasyonê selahîyetdaranê dewleta tirke ra ameya qetilkerdene, kiştoxê raştikênî nênê muhakemekerdene.

Dewleta tirke Ewropa, Rojawanê Kurdîstanî û Başûrê Kurdîstanî de kurdanê serkêşan bi rehetî kena hedef. Ma venga Konseya Ewropa û dezgehanê Neteweyanê Yewbîyayeyan danê ke wa vera nê cînayetan tedbîranê lezan bigêrê.

Seba Nagîhane Akarsel û cinîyan ê bînanê ke hetê dewleta tirke ra ameybî qetilkerdene wa edalet bêro caardene. Ma venga rojnameger, akademîsyen, hunermend, rêxistinanê heqanê merdiman û dezgehanê cinîyan danê ke nê cînayetanê sîyasîyan ser de vinderê û kiştoxanê raştikênan muhakeme bikerê.

Ma weba pawitişê cu û heqanê pawitoxanê heqanê cinîyan ê kurdan û rojnamegeran nê çîyan dibare kenê:

-Wa qetilkerdişê Nagîhane Akarsel de mesuldarê raştikênî bêrê muhakemekerdene.

-Wa warê hewayî yê Iraq û Sûrîye droneyanê çekdaran û Hêzanê Asmênî yê Tirkîya rê bêrê qefilnayene.

-Ma venga Tirkîya danê ke peynîya hêriş, polîtîkayanê îşxalî, şer û kişîyayîşanê sîstematîkan ê vera pawitoxanê heqanê merdiman ê cinîyan bîyara.

-Sûcê şerî û sûcê vera merdimatîye yê Erdogan û îqtîdarê AKP-MHPyî wa bêrê muhakemekerdene.''