Mehkemeya tirke cezaya zîndanî ya 30 serran daye Vervatoxa verêne ya Têgêrayîşê Cinîyan ê Azadan (TJA) Ayşe Gokkan.  Îstanbul de semedê Gokkane çalakîya paştdayîşî ameye kerdene.

Cinîyê ke Kadikoy de ameyî têhet binê ablûqaya polîsan de bi pankarta Ayşe Gokkan têna nîya çalakîye kerde. Swêd, Danimarka û Norveçî ra heyetêkê cinîyan zî tewrê çalakîye bi. Reyna Hemsereka HDPyî ya Îstanbulî Elîfe Bulut û xeylêk dezgehê cinîyan zî çalakîye de cayê xo girewt. Eşkerayîye de ame vîrardene ke polîtîkayê dişmenîye yê vera cinîyan dewam kenê û ame vatene ke seba ke têkoşînê cinîyan û kurdan bêro şiknayene na ceza dîyaye Gokkane. Cinîyan ard ziwan ke ê nê qerarî nas nêkene û do têkoşînê xo rixmê heme hêrişan pîlêr bikerê. Eşkerayîye de ame vateneke  cinîyî yewbînan ra hêz gene û payra manenê. Cinîyan vat ê zaf hole zanê ke înanê ke no qerar girewt do şirê û Ayşe Gokkan û hemrayê ci serbest bêrê veradayene.