Bajarê Kolnî yê Almanya  de semedê paştdayîşê serewedaritişê Rojhelatê Kurdîstanî û Îranî yo ke badê qetilkerdişê Jîna Emînî  ame destpêkerdene, çalakîye ameye kerdene.

Meclîsê Partîya Cuya Azade ya Kurdîstanî (PJAK), Komelê Cinîyanê Rojhelatê Kurdîstanî (KJAR) û 15 dezgehê cinîyan ê îranijan û çepî ke Almanya û bajaranê cîya cîyayan ê Ewropa de falîyet kenê û xeylêk kesî tewrê çalakîye bîyî. Çalakîye de sloganê "Jin Jiyan Azadî" ameyî vatene û bi kurdkî, farskî û almankî qiseykerdişî ameyî kerdene.

Berpirsîyara KJARî Meryeme Fetî mîtîng de qisey kerd. Fetî vat: ''Ma ewro semedê paştdayîşê serhildanê Rojhelatê Kurdîstanî û Îranî tîya de yê. Ça beno wa bibo ma vera nê rejîmî do payan ser bi û vengê xo berz bikerê.''

Bi nameyê cinîyanê afganan zî bale ameye antene ser problamanê ke cinîyê afganan ancenê ser. Bi nameyê çepê almanî zî ame vatene ke ganî enternasyonalîst û femînîstî paştî bidê yewbînan û wayîrê xoverdayîşê şaran vejîyê.