Hemhetkara Hemserekan û Komîsyonê Keda ra Berpirsîyare ya HDPyî Şazîye Kose budçeya 2021î hetê cinîyan ra ercnaye.

Şazîye Kose da zanayene ke budçe hem malî hem zî polîtîk a û ganî wexto ke budçe yena amadekerdene cinîyî zî budçe de bêrê pawitene.

Şazîye Kose vat: ''Heqê pêro beşê komelî estê ke budçe ra barê xo biwazê. La heta nika tewr verên cinîyan heqê xo waşt. Amadekarîya budçe de giranîye nêdîyena hewcedarîyanê komelî. Cinîyî zî yenê peygoşkerdene. Ma sey HDP û dezgehê cinîyan zî wazenê ke wa budçe goreyê cînsîya komelkîye bêra awankerdene. Wexto ke ma ewnîyenê budçe vînenê ke budçe têna camêrdan rê dîyena kişt.

HDP, cinî û pisporî ameyî têhet û ma do pîya raporêk amade bikerê, dima zî nê raporî pêşkêşê Meclîsî bikerê. No seba budçeya cinîyan do bibo gamêka giranêr. Ma na babete ser o xebatanê xo dewam bikerê.''

Şazîye Kose bale ante ser ke îqtîdarî qestî ra cinîyan rê teda keno û vat: ''Welatê ma de tewr zêdêr cinîyî vera îqtîdarî têkoşîn kenê. Reyna tewr zaf zî cinîyî maruzê tedaya îqtîdarî manenê. Îqtîdar qestîr a wina keno. Tewirê îqtîdarî yê vera tacîz, tecawuz, şîdetî tewirêko zanayîye yo. Îqtîdar zaneno ke eke têkoşînê cinîyan potansîyelê xo bimojno ê do nêeşkê meqamê xo de vinderê.''

Şazîye Kose pêşnîyazê Wezaretê Cinîyan vist vîrî û vat: ''Qet yew wezaret nêeşkeno nameyê ma ser o qisey bikero. Ganî yew dezgehê cinîyan bibo ke pêro meseleyanê înan çareser bikero. Ewro cewabê pers û meseleyanê cinîyan çin ê. Ma wazenê cewabê nînan bidê. Ma damarê gonî yêkomelî yê. Ganî bi fikr û pêşnîyazê nê damaran wezaretîyêke bêra awankerdene. Seba na babete têkoşînê ma do dewam bikero.''