Şaristananê Koln, Stuttgart, Duisburgî yê Almanya de û paytextê Danîmarka Kopenhag de şîdetê vera cinîyan ame protestokerdene.

Duisburg

Şaristanê Duisburgî yê Almanya de çalakîya rayberîya Meclîsê Cinîyan ê Şehîde Asya Yuksel de şîdetê vera cinîyan û hêrişê vera dezgehanê cinîyan ameyî protestokerdene. Çalakîye de Meclîsê Cinîyan ra Amara Tolhildan qisey kerd û îfade kerd ke ganî cinîyî vera zulmî pîya têbigêrê.

Koln

Koln de zî Paştdayîşê Cinîyan ê Ewropa şîdetê dewlete û camêrdan protetso kerd. Çalakîye de sloganê ''Hêrişê vera cinîyanê kurdan vindarnê'', ''Huqûqo pederşahî nê, edaleto raştikên'' ameyî vatene.

Stuttgart

Pê vengdayîşê Paştdayîşê Cinîyan ê Ewropa Stuttgart de çalakîyêke ameye kerdene. Çalakîye de şîdetê vera cinîyan ame protestokerdene û sloganê sey ''Cinîye, Cuye Azadîye'', ''Ma pîya vera sîstemî têkoşîn bikerê'', ''Biciwîyo paştdayîşo enternasyonal'' ameyî vatene.

Kopenhag

Paytextê Kopenhagî yê Danîmarka de şîdetê vera cinîyan pê çalakîyêke ame protestokerdene. Çalakîye de pê dowîzan bale ameye anete şîdetê vera cinîyanê Efrînî. Çalakîye pê sloganê ''Cinîye, Cuye Azadîye'' qedîyaye.