Vayê şorişî ke aşma Temmuze ya serra 2012 de Rojava de ame tenya Kurdistanijanê ke vakurê Sûrîye de yê nê heme şaranê ûcayî ser o tesîr kerd. Şerê hemverê DAÎŞî ke hetê YPG û YPJyî ra dîyayêne seva şarê erebî zî bi roşnîya umîdî.

Hêzê Kurdistanî yê bisîlehan mucadeleyê hemverê çeteyan de seva şarê erebî zî rayîr akerd. Kadîr Ustayan beyraqa xo dewrê Ebu Leylayan, Ebu Leylayan zî beyraqa xo dewrê peyrewanê xo kerde.

HELEB RA VER BI TIRBÊSIPÎYE, TIRBÊSIPÎYE RA VER BI KOYANÊ KURDISTANÎ

Hêlîn Tirbêsipîye (Helin Arap) a ke eslê xo Heleb ra ya û Tirbêsipîye de amîya dinya wextêko kilm dimayo ke tewrê YPG û YPJyî bî verê xo da koyanê Kurdistanî û tewrê PKKyî bî.

Hêlîn Tirbêsipîye ard ziwan ke keyeyê ci tim bi sempatî nizdê Rayberê Şarê Kurdî Abdullah Ocalnî û PKKyî bîyo û vat: „Helbet sempatîya înan hendeyo ke keynaya îna tewrê ci bibo vêşî nêbî, la bunyeyê QSDyî de di birayanê mi zî cayê xo girewtîbî.“

'EZ ŞÎYAYÎŞÊ YPG-YPJYÎYAN Ê BIRÎNDARAN BI CEPHEYÎ RA MUTESÎR BÎYÊNE'

Tirbêsipîye nê vatî: ''Ma dîyêne ke YPG û YPJyîyan  senî ciwîyayêne û têgêrayêne. Gama ke ê birîndar zî kewtêne reyna vazdayêne cepheyan. Nê têgêrayîşê înan ma ser o tesîr kerdêne.“ Tirbêsipîye her çend gama ke şer kerdêne hetêna ra wendêne zî dimayo ke tewrê YPJyî bî wendişê xo ca verda. 

Tirbêsipîye wina dewam kerd: „Birayanê mi dir têkîlya mi bîbî sey têkilîya embazan. Gama mi birayê xo Zerduştî ra vat ke ez wazena tewrê têgêrayîşî bibî, ê vat ‚ez qerarê to rê hurmet ramojnena‘. La eke mi verê YPG-YPJyî ê ra wina çîyêk bivatêne çîyêko winayên mumkun nêbîyêne.“

'PKK KOMELÊK O KE HER MILETÎ RA ŞAR TEDE ESTO'

Tirbêsipîye ard ziwan ke ya 5 aşmê mîyanê sefanê YPG-YPJyî de bîyayîş xo rê kemî dîyo, naye ser o qerar dayo ke bêro Kurdistan û vat: “Mi waşt ke nizd ra fam bikerî çira Rayberê ma Ocalan zindan de yo? Çira nê merdimî bi serran koyan de yê? Kurdistan çira nêno naskerden? Cewabê persanê bi nê hawayî ez ewro hîna zaf wazena bimûsî.” 

Dewamê qiseykerdişî de vat: „Cinî ko de sey yê cimatî nêya. Tîya seypêyîye esta. PKK komelêk o ke tede tirk, alman, fransiz, fars, ereb her cayê dinya ra şar esto.”

'BI DESAN DEWLETÊ EREBAN ESTÊ LA SEVA ŞARÊ EREBÎ AZADÎYE NÊANÊ'

Tirbêsipîye wina dewam kerd: “Seke Rayberê ma zî vano ‘do cinî azad bo‘. Verî ma xo rê vatêne eke cilanê ke wazena bido xo ra yan zî telefonê ci yo modelo tewr peyên estbo azad a. La ma fam kerd ke kemasîyê ma yê fikrî estê.

Bîyayîşê bi desan dewletanê ereban nêno manaya azadî. Eksê ci ra zihnîyeto dewletperwer vernîya fikirîyayîşê azadî û şarê erebî de astengîyêka muhîm a.“

'SELAMUN ALEYKE YA WETEN!'

Peynî de Hêline ard ziwan ke aye nê nameyî nameyê gerîlayêka YJA-STARî ke cuya xo vindî kerda ra girewto. Roja ke resaya koyanê Kurdistanî zî dest bi nûştişê şîîranê kurdkî û erebkî kerdo. Şîîranê ci de gerîlayê ke cuya xo vindî kerdê, Rayberê Şarê Kurdî Abdullah Ocalan, heskerdişê wetenî temayê sereke yê. Şîîra ci ya peyêne zî bi nameyê "Selamun aleyke ya Weten" a.